A edila xalleira Silvia Cancela pásase de Terra Galega ao Partido Popular
SANTA COMBA
O grupo que lidera a alcaldesa María Pose refórzase, pero segue en minoría
20 ene 2019 . Actualizado ás 14:42 h.O grupo municipal do PP de Santa Comba, que lidera a alcaldesa María Pose, refórzase coa incorporación da concelleira Silvia Cancela Blanco , ata agora de Terra Galega, grupo co que os populares manteñen unha alianza de goberno neste mandato.
Silvia Cancela, moi vinculada ao club Xallas, exerce a delegación de Deportes no executivo de Santa Comba e a finais do pasado ano pasou a formar parte da directiva da Federación Galega de Fútbol como vogal para a zona da Costa. Tanto Cancela como a alcaldesa mantiveron unha boa sintonía durante este mandato, que ningunha das dúas ocultou.
Coa fichaxe de Silvia Cancela, o PP de Santa Comba reforza as súas posicións ao sumar o sexto concelleiro, pero non lle dá a maioría da corporación municipal. Terra Galega queda con dous edís, Francisco José Ameijeiras e Javier Facal, primeiro e segundo tenentes de alcalde, respectivamente, e os socialistas son o único grupo de oposición, con cinco edís baixo o liderado de José Antonio Ucha.