Foi un gran animador da vida padronesa como mestre e colaborador en deportes e outros ámbitos
31 jul 2021 . Actualizado ás 21:48 h.O falecemento hoxe pola mañá do veciño Ramón Vázquez Casasnovas colleu por sorpresa a Padrón, por cuxas rúas o profesor xubilado paseou aínda hai dous días. O seu inseparable amigo, Masito Beiró, non esconde a profunda tristeza pola perda do que foi o seu mestre e o de varias xeracións de nenos de Padrón, concello ao que chegou para exercer a docencia tras deixar atrás a vida militar, na que exerceu como tenente de Artillería, aínda que este é un dato que moitos non coñecen.
Casasnovas, que é como lle coñecía todo o mundo, cumpriu 80 anos o pasado día 23 de xullo. Residía no lugar de Muíños, na Escravitude, aínda que era natural de Ourense. Exerceu como profesor corenta e un anos, trinta e oito deles en Padrón, e foi durante máis de catro décadas colaborador na organización das festas de Pascua, con especial dedicación a o Libro promocional.
Casado cunha profesora, coa que tivo cinco fillos (unha falecida), tamén foi concelleira durante oito anos con Jesús Villamor como alcalde. Xuíz de Paz en Padrón (outro dato menos coñecido da súa vida), árbitro titulado de fútbol sala e de veteranos, fundador do club de fútbol da Escravitude e directivo do Flavia, Vázquez Casasnovas foi un claro animador da vida padronesa, desde o ámbito da educación e o deporte, entre outros. Tamén foi o director durante anos dos campamentos da Asociación Xuvenil Española e da empresa Campsa. En Padrón, coordinou durante dez anos os intercambios coa localidade francesa de Noirmoutier, coa que está hermanada o Concello.
Na súa etapa como docente, foi director do colexio Rosalía de Castro e un dos primeiros profesores do denominado Colexio Libre Adoptado Salas Pombo, situado no espazo que ocupa o actual centro social. O propio Casasnovas dixo nunha ocasión que el fixo carreira en todo», e con matrícula de honra na materia da amizade. E diso dá boa fe o seu inseparable amigo Masito Beiró, que hoxe o lembra como unha persoa "humilde e altruísta, moi amigo de axudar aos demais". Tamén os seus antigos alumnos lémbrano con moito agrado e cariño.
A Sociedade Deportiva A Escravitude xa expresou a súa pesar polo falecemento do que era o socio número uno da entidade e o seu primeiro presidente, no ano 1967. "Moitas grazas por botar sempre unha man ao Club, aos veciños e a todo o pobo de Padrón" son as palabras que lle dedica a entidade e que resumen a súa forma de ser.
O velorio é no tanatorio de Boisaca, pero a familia non recibe duelo. Ramón Vázquez Casasnovas será despedido mañá na intimidade.