O goberno local quere mellorar o actual edificio e na oposición piden cambio
08 dic 2019 . Actualizado ás 05:05 h.A raíz do debate suscitado en Padrón sobre a necesidade manifestada polo grupo socialista de acometer melloras na biblioteca municipal situada no Campo do Souto, ábrese outro sobre se sería mellor trasladar o centro de lectura a outro edificio, dadas as limitacións do actual.
En pleno, todos os grupos políticos, incluído o do goberno, coincidiron, precisamente, en que o edificio é antigo e non permite melloras como a instalación dun ascensor, co que se limita o acceso a persoas con mobilidade reducida á segunda planta, na que están boa parte dos libros de consulta.
Outro problema difícil de solucionar no actual emprazamento é o dos ruídos procedentes do tráfico que pasa pola vía que está de lado da biblioteca e, mesmo, o acceso á mesma en cadeira de rodas, cun chanzo inicial, sen contar que a zona na que está tamén se usa como descarga, co consecuente ruído dos camións.
Xulgados
Fai xa dez anos, aproximadamente, que o edil de Compromiso por Padrón, Eloy Rodríguez, que entón era concelleiro de Cultura por CIPa, propuxo a idea de trasladar a biblioteca a un «edificio máis amplio e mellor situado», que reúna as condicións necesarias, segundo lembrou no recente pleno. Ese inmoble podería ser o que acolle os Servizos Sociais, na praza Rodríguez Cobián, máis apartado do ruído do tráfico e sen barreiras arquitectónicas (ten ascensor).
Á súa vez, as oficinas de Servizos Sociais pasarían, tal e como propuxo entón e segue propondo Eloy Rodríguez, ao edificio da biblioteca e ao centro social. Outra proposta no seu momento de traslado do centro de lectura sería ao edificio dos Xulgados, unha vez que durante o goberno bipartito houbo a idea de construír un novo inmoble xudicial nunha parcela da zona do Bordel, na que tamén se ía situar a Policía Local.
No entanto, o proxecto de urbanización desa zona de entrada a Padrón quedou en nada por mor da crise e segue así na actualidade. Pero a idea de trasladar a biblioteca non convence o goberno local, que é máis partidario de seguir mellorando o actual edificio nas medidas das súas posibilidades. Así, de acordo coa concelleira de Cultura, Lorena Couso, nos últimos anos renovouse o equipamento do centro, que o ano pasado tivo case 30.000 usuarios.