O futuro centro da firma situarase en Padrón e será pioneiro do seu sector en España
19 dic 2019 . Actualizado ás 13:01 h.A empresa Cortizo construirá en Padrón un campus tecnolóxico. Trátase dun proxecto único no sector en España, destinado á investigación e á formación e no que traballará un equipo de 350 enxeñeiros e arquitectos dedicados ao desenvolvemento de cerramentos a medida para grandes edificacións de todo o mundo.
A multinacional galega, líder nacional na fabricación de perfís de aluminio e PVC para a arquitectura e a industria, acaba de presentar o campus, que nace como «o espazo de enxeñería de envolventes máis importante de Europa», explica. O proxecto, que asina Miriam Cortizo, filla do fundador da empresa padronesa, é a dous anos vista, de modo que nestes momentos se atopa en fase inicial, cos trámites administrativos necesarios en marcha para solicitar a recualificación dos terreos nos que se situará.
30.000 metros cadrados
As novas instalacións construiranse sobre unha parcela de 87.000 metros cadrados no lugar de Lamas, en Padrón , a só 500 metros da sede central de Cortizo. O complexo, que suporá un investimento aproximado de 40 millóns, contará cunha superficie construída de case 30.000 metros cadrados e estruturarase en tres grandes edificios e un cuarto bloque destinado ao aparcadoiro. Serán edificacións construídas baixo criterios de sustentabilidade, de consumo enerxético nulo ou case, e integradas na súa contorna natural xunta ao río Sar, fomentando os espazos verdes.
Un edificio estará dedicado á investigación, outro a laboratorio e un terceiro a uso social. O primeiro é, segundo a empresa, «o corazón do proxecto». Terá unha superficie de 8.000 metros cadrados, destinados integramente á innovación, co obxectivo de desenvolver fachadas e cerramentos a medida para proxectos arquitectónicos en todo o mundo. Así, a primeira planta será un gran espazo diáfano no que un equipo de 350 enxeñeiros levará a cabo a súa actividade de I+D+i. Este área tamén terá unha «clara vocación académica», explica a empresa, xa que ese equipo se encargará de trasladar o seu know-how aos clientes, arquitectos e enxeñeiros que vaian traballar cos cerramentos desenvolvidos por Cortizo para asegurar así a súa perfecta fabricación e execución.
En canto ao laboratorio, todos os sistemas de aluminio e PVC desenvolvidos no módulo de investigación serán testados neste edificio. Para iso, o campus tecnolóxico Cortizo contará con case 6.000 metros cadrados destinados ao ensaio dos sistemas deseñados polos departamentos de Enxeñería e Investigación. A multinacional galega contará cun laboratorio punteiro en Europa que permitirá examinar cada un dos novos produtos, adecuándoos á realidade construtiva do país no que vaian ser instalados.
Edificio social
O edificio social constará de 4.240 metros cadrados pensados para o lecer, esparexemento e conciliación laboral dos seus traballadores. Así, disporá de auditorio con capacidade para 300 persoas e gardería de 500 metros cadrados (a metade, exteriores) para o coidado dos fillos dos traballadores. Tamén haberá unha cafetería- restaurante, ademais de salas de leceres e un ximnasio na segunda planta, na que tamén se situarán as aulas de formación. A autora do proxecto cualificou o edificio social como un «lugar moi importante» dentro dun campus «moderno, para o futuro», no que o esparexemento e a relaxación tamén teñen cabida. As instalacións completaranse cun cuarto bloque destinado integramente a aparcadoiro, con 350 prazas.
O campus é o proxecto de futuro da multinacional galega, que xa ten en marcha o de presente, a ampliación das súas instalacións no polígono situado entre Padrón e Rois. Suporá a creación de máis de 210 empregos tras un investimento de case 67 millóns.