Constituído o xurado que xulgará ao acusado polo crime dun mozo en Ordes, que se enfronta a 20 anos de cárcere

A sección primeira da Audiencia Provincial da Coruña constituíu onte o xurado que terá que xulgar ao acusado de ter asasinado en Ordes ao novo dominicano de 24 anos de idade Álvaro Paredes, que vivía nesa localidade xunto á súa parella e a súa filla cando na madrugada do 16 de xullo do 2016 foi acoitelado no pescozo, ferida que lle causou a morte.

O que se sentará no banco é Julián Eduardo V. T., que tras o crime fuxiu a Colombia, pero que puido ser detido grazas á brillante investigación que levou a cabo a Policía Xudicial da Garda Civil da Coruña, que grazas ao ADN esclareceu o caso e logrou que se detivese e extraditase ao sospeitoso, que prestou servizo no Exército español e que presuntamente se dedicaba ao tráfico de drogas a pequena escala en Ordes.

Ese foi, precisamente, o móbil que os investigadores creen que motivou o crime de Álvaro Paredes: unha disputa por un asunto relacionado coas drogas que tería desencadeado o ataque cun coitelo. A Fiscalía pide para Julián Eduardo V. T, a pena de vinte anos de cárcere, así como que abone indemnizacións á súa parella, filla e nai por valor de 130.500, 75.000 e 101.500 euros, respectivamente.

Precisamente, na primeira sesión do xuízo, o avogado que representa á nai da vítima, Manuel Astray, advertiu que tanto ela como os seus dous fillos e irmáns do asasinado, que estaban todos citados para declarar como testemuñas o vindeiro mércores, están en corentena por coronavirus. «Esta situación non está resolta na lei do xurado nin na de enjuiciamiento criminal, así que non se como se resolverá», sinalou o letrado.

---

---

---