A velocidade e o exceso de confianza, causas dos sinistros
11 ene 2020 . Actualizado ás 05:00 h.«Hai poucos accidentes, pero os que hai, son tremendos». Así definiu onte un veciño da Silva (Cerceda) o tramo da AC-413 que este domingo pola noite foi, por desgraza, escenario doutro tráxico sinistro viario, con dous mozos falecidos, un veciño da Silva, de 21 anos, e outro residente en Ordes, de 26, así como un matrimonio, un home de 53 anos e a súa muller de 51, feridos, aínda que fóra de perigo.
A AC-413 é unha estrada de titularidade autonómica moi transitada. Enlaza Cerceda, Ordes, Carballo, A Silva, Tordoia... «A xente deica que vai para o aeroporto de Lavacolla adoita coller esta estrada cara a Ordes e de aí a Santiago». Tamén é un viario utilizado para os que desexan coller a A-6, dirección Madrid: «Saímos de Cerceda, collemos cara a Ordes e, de alí, enlazamos con Curtis, Teixeiro e Guitiriz antes de coller a autovía», indicou un usuario da AC-413: «Veño sempre por esta estrada, como mínimo, dúas ou tres veces á semana», argumentou.
A denominada recta da Tablilla ten uns dous quilómetros de lonxitude. Arrinca na curva da Ferralla e remata en Xesteda, tras pasar pola Tablilla. O tramo poboado está limitado a 50, aínda que hai outros, a 70 e 90: «O problema da recta da Tablilla é o exceso de velocidade e de confianza. A maior parte dos que a utilizan son xente de aquí ou veñen a esta zona a traballar, e claro, é unha recta de dous quilómetros e invítache a pisar», explicou outro veciño da Silva, quen lembrou as visitas do radar de Tráfico por esta recta.
A AC-413 foi arranxada fai xa uns anos, segundo confirmou onte o alcalde de Cerceda, José García Liñares: «Fíxose unha obra en dúas fases: A Silva-Ordes e A Silva-Carballo, e lembro que na recta da Tablilla eliminouse un cambio de rasante que era moi perigoso», dixo.
Recordo
O tráxico accidente do domingo fixo lembrar a moitos veciños da parroquia de Rodís o sinistro ocorrido sobre as cinco e media da madrugada do domingo 21 de decembro do 2014. Un mozo de 26 anos perdeu a vida a escasos catro quilómetros da súa casa. O vehículo que conducía, un Peugeot 206, chocou por detrás cun camión cisterna, que circulaba no mesmo sentido. A consecuencia do terrible impacto, o Peugeot 206 saíu desprazado varios metros e o condutor, despedido. O vehículo, que quedou esnaquizado, impactou finalmente contra un autobús aparcado nas inmediacións.
Desgraciadas similitudes
Ambos os sinistros gardan, por desgraza, algunhas similitudes: foi un domingo, o falecido este domingo e o do 2014 residían na mesma parroquia (Rodís), todo apunta a unha velocidade inadecuada e unha persistente néboa na zona: «Aquí, a néboa, cando baixa, carga moito máis que noutros sitios, apenas che deixa ver», lembrou un residente na Silva.
Ademais, nesta recta da Tablilla, producíronse varios accidentes graves nos últimos anos. O máis brutal foi, sin duda, o rexistrado na mañá do 26 de xaneiro do 2013. Dous vehículos, Un Seat León e un Citroën C-5, chocaron frontalmente en plena recta e coa néboa, outra vez, como principal protagonista.