Sanjurjo anunciou «rigor e ilusión para os novos retos»
16 jun 2019 . Actualizado ás 05:00 h.José Luis Martínez Sanjurjo estreouse onte como alcalde de Ordes por maioría absoluta cunha tranquilidade que non tivo fai catro anos, cando a toma de posesión celebrouse en xullo porque Manuel Regos, de Unión por Ordes, presentou un recurso que non chegou a prosperar. Agora, UxO segue na corporación coa metade de concelleiras e a renuncia a acta de Regos Boquete.
O rexedor popular, con alusións a Castelao no seu discurso, afirmou que «ante os novos retos aos que nos enfrontaremos e as oportunidades de envergadura, trataremos de responder con traballo, ilusión, rigor, honestidade e con absoluta transparencia».
Á hora das votacións, soamente PP e PSOE presentaron aos seus respectivos candidatos, polo que a elección do cabeza de lista popular foi practicamente automática.
Na súa intervención, Martínez Sanjurjo agradeceu «o inmenso caudal de confianza que articulou unha maioría absoluta que fará máis doada a acción de goberno a prol de todas as veciñas e veciños, indistintamente de a quen votaran».
Sobre a súa acción de goberno, ademais de priorizar a aprobación do o Plan Xeral de Ordenación Municipal, sinalou que a súa lema electoral, «dito e feito, será o principal dos nosos actos». Para iso ofreceu ás demais forzas políticas «lealdade institucional e man tendida porque por riba das nosas diferenzas se sitúa o interese supremo de Ordes». Tamén anunciou unha «interlocución fluída e exemplar».