Apoiarán un novo proxecto que garanta o respecto ao medio ambiente
27 abr 2021 . Actualizado ás 05:00 h.A Asociación Plataforma Mineiros Touro O Pino mantivo unha reunión coa empresa promotora do proxecto mineiro, Cobre San Rafael, para mostrarlle o seu compromiso coa actividade industrial na zona e o apoio da comarca a un novo proxecto que teña en conta as esixencias dos veciños e adopte as medidas necesarias para garantir a súa viabilidade con respecto ao medio ambiente. Valoran que o proxecto prevé crear emprego de calidade, con 400 postos directos e 1.500 indirectos.
Entre as esixencias expostas pola asociación aos promotores da mina figuran a xeración de sinerxías industriais co proxecto mineiro, coa participación da cidadanía, institucións e empresas para asegurar un desenvolvemento sostible que multiplique os beneficios para a comarca; facer efectivo o compromiso do proxecto de solucionar os pasivos mineiros da antiga explotación; certificar o vertido cero de augas sen tratar a ríos da contorna e ao Ulla; que se contrate un organismo de control externo independente; compromiso de compras e contratación de obras e servizos con empresas e autónomos da zona; e emendar o problema de malos cheiros derivados de Tratamentos Ecolóxicos do Noroeste.