A carreira atravesou unha explotación láctea
23 abr 2019 . Actualizado ás 05:00 h.A primeira edición da carreira Nestlé Clásica Gandeira de Santa Comba coroou a Amador Pena, do Atletismo O Pino, e á mundialista Teresa Castro, do Noia. Estrearon o palmarés na proba reina de 10.000 metros, que reuniu a douscentos participantes, a máis diso as probas de escolares e a de tres quilómetros.
Amador Pena empregou 32 minutos e 7 segundos, por diante do segundo, o seu compañeiro de club, Juan Álvarez, cun segundo de diferenza, e de Rubén Caamaño, do Atletismo Sar. Foi un 10K dos máis xenuínos de Galicia, alternando asfalto e terra, entre a capital do Xallas e a parroquia de Alón, coa singularidade de que no quilómetro tres os corredores atravesaron a explotación gandeira SAT Os Agros, de catrocentas vacas, xerando imaxes únicas.
No apartado feminino a gañadora foi a mundialista Teresa Castro, no posto 40, cun rexistro de 38:25, por diante de Montse Solís e Isabel Babiano.
Na proba de 3.000 metros o vencedor foi Alberto Carballo, por diante de Marcos Ferreiro e Aníbal Barca. A primeira muller foi Natalia Rivas (O Pino), seguida de Andrea Gómez (Noia) e Alicia García (Olimpia). Por equipos o primeiro posto levoullo o Atletismo Sar por diante do O Pino e o Noitebra.