Avelino García faleceu en Bordeus aos 102 anos tras pasar cinco como prisioneiro no campo de concentración nazi, onde coincidiu co fotógrafo Francisco Boix
06 abr 2019 . Actualizado ás 01:34 h.Avelino García García foi o negreirés que saíu vivo do campo nazi de Mauthausen, onde ingresou en xaneiro de 1941 xunto ao fotógrafo Francisco Boix. Permaneceu case cinco anos neste campo de concentración nazi. Contra o que se cría sobre a orixe da súa entrada en Mauthausen, o caso de Avelino García, nacido na aldea de Maio Pequeno, fillo de Isolina García, a dá Xalleira, non foi por mor do seu exilio a Francia.
Grazas a establecer contacto co prestixioso historiador e investigador Benito Bermejo, o maior especialista no estudo dos deportados españois aos campos de concentración nazis, José Manuel López Tuñas, historiador e exalcalde de Negreira, puido confirmar que Avelino García emigrou a Francia -supostamente porque era de familia pobre e non tería diñeiro para emigrar a Cuba ou Venezuela, que na súa época eran os destinos na zona de Negreira-, onde traballou moitos anos de leñador nos bosques das Landas, no suroeste do país veciño. Máis tarde incorporouse ás brigadas internacionais que loitaron contra o bando franquista na Guerra Civil.
Avelino García García sobreviviu a cinco anos de prisioneiro no campo de exterminio de Mauthausen. Benito Bermejo puido entrevistalo en Pessac, a segunda comuna máis grande da área suburbana de Bordeus (Francia), onde García fixou a súa residencia. Tuñas solicitou información de Bermejo sobre o negreirés: «Confirmoume que faleceu o 12 de maio de 2016 cando contaba con 102 anos de idade», relata José Manuel López Tuñas, quen non oculta que reaccionou con «sorpresa» cando Bermejo lle contou que coñecera en persoa a Avelino García e que o entrevistou como a outros tantos españois que lograron saír con vida do campo do horror nazi preto de Linz (Austria).
Benito Bermejo contoulle que Avelino era dos máis lonxevos entre os deportados españois e que era unha persoa moi lúcida. Daquel encontro, pediulle a Bermejo que lle conseguise un certificado do Concello de Negreira para a prórroga da súa residencia en Francia. «Benito díxolle que despois de tantos anos vivindo en Francia podía pedir a nacionalidade, ao que Avelino contestoulle: Eu, español ata a morte», subliña o historiador negreirés. Bermejo logrou aquel certificado no ano 2002 que logo remitiu a Pessac, onde Avelino viviu só, sen familia.
Tamén lle contou a José Manuel López Tuñas como chegou Avelino García a verse inmerso nos conflitos bélicos. «Unha vez nas brigadas internacionais veu cos franceses a España. Estivo moito tempo no cuartel xeral que tiñan os estranxeiros en Albacete e participou nas batallas máis importantes da Guerra Civil. Logo, retiráronse a Francia e estivo construíndo trincheiras na fronteira con Austria e alí e onde foi detido polos nazis, que o enviaron en tren na mesma expedición que Francisco Boix para Mauthausen, xa que os números de presos tatuados nos brazos eran moi próximos», segundo contoulle a Bermejo, quen deu por casualidade con Avelino García. «Viaxou a Burdeos para entrevistar a un deportado español, pero este, que era moi maior, faloulle dun galego que vivía en Pessac e que estivera en Mauthausen». E así foi como o coñeceu.
Recala en Negreira a mostra coa que se rende tributo a Boix e a súa obra
A exposición da Asociación pola Recuperación da Memoria Histórica que rende tributo ao coñecido como «fotógrafo de Mauthausen», Francisco Boix, (Barcelona, 1920-París, 1951), permanecerá desde o vindeiro luns e ata o día 28 en Negreira. Boix foi un membro das Mocidades Socialistas Unificadas que, tras a Guerra Civil, exiliouse a Francia e foi enviado a Mauthausen. Co seu cámara retratou as extremas condicións de vida dos deportados, como fotógrafo do campo de concentración. Boix fixo copias dobres dos seus negativos e, xunto a outros tomados polas SS que logrou roubar do laboratorio, foron unha proba clave para condenar as atrocidades nazis no xuízo de Núremberg.