Ames xestiona a compra de chan para proxectos educativos e deportivos en Bertamiráns
AMES
As parcelas terán un uso provisional como aparcadoiro
06 jun 2019 . Actualizado ás 05:05 h.Boa parte dos equipamentos educativos e deportivos de Bertamiráns concéntranse na mesma zona e o Concello de Ames proxecta que os previstos nun futuro para a capital do municipio sitúense nesa contorna. E dado que non ten ningún terreo neste ámbito, iniciou un procedemento administrativo de compra de dúas parcelas de Castrigo, que unidas miden 9.666 metros cadrados.
Neste terreo podería construírse a medio prazo un segundo instituto, outro colexio ou instalacións deportivas. Así o avanzou onte o edil de Educación en funcións, David Santomil, que recoñece que as prioridades en materia educativa da Xunta pasan por construír o novo colexio no Milladoiro, o que non quita que tamén sexa necesario reforzar a oferta en Bertamiráns, máis aló do colexio Agro do Muíño. E para que isto sexa posible o Concello debe estar en disposición de ceder o chan á Xunta.
Unha vez formalizada a compra, cun prezo de saída de 66.800 euros, os terreos vanse a utilizar provisionalmente como aparcadoiro. Con esta solución, argumenta Santomil, eméndanse os problemas para estacionar na zona, sobre todo despois da reorganización por razóns de seguridade viaria.
O terreo obxecto deste expediente está incluído no documento municipal de avance do plan especial de infraestruturas e dotacións. Formalmente tramítase para a ampliación do colexio A Maía, pero as posibilidades de aproveitamento non se cinguen só a esa posibilidade. O que si avanza o Concello é que reservará parte dos terreos para aparcadoiro.
As xestións administrativas deron os primeiros froitos e a Dirección Xeral de Calidade Ambiental e Cambio Climático informou favorablemente o proxecto e ditaminou que non era necesario sometelo ao proceso de avaliación ambiental, remitindo o expediente ao Concello para que continuase coa tramitación, o que derivou no proceso de compra que agora se inicia.
Rexistro de chan
Mentres a adquisición de chan en Bertamiráns arrinca coa fase de licitación, a compra de terreos para construír o novo colexio do Milladoiro está pechada, pero pendente da inclusión dos terreos no Rexistro da Propiedade, en Negreira. Cumprimentado este trámite, o terreo xa poderá entregarse á Xunta, cuxos presupostos deste ano recollen un avultado investimento para construílo.