O tripartito de Ames e AN chegan a un acordo para aprobar un orzamento de 25,8 millóns
AMES
Esta cifra eleva nun millón de euros o importe das contas que están en vigor
16 feb 2019 . Actualizado ás 05:05 h.O goberno tripartito de Ames (PSOE, Contigo Pódese e BNG) pechou un acordo con Ames Novo (AN) para propiciar a aprobación do orzamento municipal deste ano, que ascenderá a 25,8 millóns, cifra que eleva nun millón o importe das contas que están en vigor. Segundo confirmou o executivo local, «ambas partes puxeron de manifesto a necesidade de dispor duns orzamentos novos que permitan incorporar esa cifra de máis dun millón de novos ingresos, e, ao tempo, acometer investimentos necesarios para satisfacer demandas da cidadanía».
Entre os proxectos avanzados destacan futuras dotacións para os comedores escolares que posibiliten «incorporación de novos usuarios antes do fin do presente curso e un incremento significativo de prazas para o próximo».
Precisamente, a xestión deste servizo, as listas de espera de familias que non puideron acceder ás prazas dos comedores e as diferentes alternativas a este problema supuxeron o elemento de discordia que máis distanciou a Ames Novo do grupo de goberno.
Co acordo global xa pechado, ambas as partes seguirán negociando a próxima semana para acordar o documento final. Todo apunta a que non poderá aprobarse durante a próxima sesión plenaria, prevista para o próximo día 28.
O goberno local resaltou que este é o terceiro acordo negociado con Ames Novo para aprobar os orzamentos durante este mandato.