Santiago perdeu 51 veciños desde o último censo, mentres Ames sumou 443 e Ordes recupera
03 ene 2019 . Actualizado ás 05:00 h.Con varios días de atraso respecto de anos anteriores, o Instituto Nacional de Estatística (INE) ofreceu a súa última radiografía demográfica. E nela, os 25 municipios que conforman a área metropolitana de Santiago volven saír mal parados se se comparan os datos globais publicados onte polo Boletín Oficial do Estado (BOE) respecto dos do ano anterior, que viron a luz o 29 de decembro do 2017. Os primeiros corresponden ao dato oficial de poboación do 1 de xaneiro do 2018 e os segundos, á mesma data do 2017. Entre os 365 días de diferenza constátase un descenso demográfico de 146 persoas.
Esta cifra por se soa non parece preocupante, pero a desagregación por municipios evidencia novamente que o motor demográfico da comarca política de Compostela non tira como outrora, mentres que os concellos en pleno manco poboacional empeoran os seus datos a pasos axigantados.
O signo negativo regresa á capital galega, que perdeu 51 habitantes, mantendo así o baile de cifras dos últimos censos, con constantes bandazos pero cun resultado final positivo se se ten en conta que, por exemplo, no ano 2010 había 1.581 composteláns menos, un número similar á poboación actual do municipio de Toques.
Ames sigue sendo o concello de referencia, xa que engordou o seu censo en 443 habitantes, acadando os 31.278 empadroamentos. Ordes, que perdeu 89 habitantes entre os anos 2016 e 2017, cambiou a súa tendencia e na análise demográfica máis recente convértese no segundo municipio con maior puxanza demográfica, ao elevar o seu censo ata as 12.632 persoas, unha cifra que está moi afastada, por exemplo, dos 12.963 habitantes contabilizados no informe do INE do ano 2012.
O resto de rexistros positivos quedan en concellos limítrofes con Santiago. Así, ao municipio de Ames séguelle o de Brión, con 49 veciños máis no último censo. Teo está en terceiro lugar con 47 novos habitantes. A cifra máis inusual que guinda o INE é a de Oroso, que mantén os mesmos 7.452 veciños do 1 de xaneiro do 2017. O Pino volve á senda positiva, coa recuperación de doce habitantes respecto ao 2017, tres habitantes máis que na estatística do 2016.
Boqueixón, Vedra e Val do Dubra manteñen a súa tendencia negativa, sobre todo o primeiro, que adelgazou o seu censo en 27 persoas, a peor cifra da comarca tras Santiago, mentres que Val do Dubra retardou a súa caída ao perder seis habitantes fronte aos cinco de Vedra. Este concello mantense, un ano máis, no grupo de municipios de máis de cinco mil habitantes, pero cunha marxe cada vez máis estreito.
258.248 persoas
Ano 2018
O 1 de xaneiro do 2017 o censo da área metropolitana era de 258.394, 146 persoas máis.
1.151 habitantes
Toques
O concello con menos poboación perdeu 22 habitantes segundo o último censo do INE.
443 veciños máis
Ames
Desde o ano 2010 este concello sumou máis poboación que veciños ten agora Tordoia.
Padrón, Tordoia e Touro adelgazan os datos do INE en máis de setenta persoas cada un
A radiografía anual do INE devolve unha imaxe nada halagüeña para todas as comarcas que conforman a área compostelá, salvo a que preside Santiago.
O peor dato do ano ofréceo o municipio de Padrón, con 77 persoas menos no censo, converténdose no concello que máis habitantes perdeu respecto da última estatística oficial do INE. En datos porcentuais a situación é máis grave no municipio de Touro, que ten 73 veciños menos, e Tordoia, con 72, xa que en ambos os casos o seu censo non chega, nin de lonxe, aos catro mil habitantes, mentres que a capital da comarca de Sar supera con folgura as oito mil persoas censadas. Engadindo ao dato negativo padronés as diminucións de Rois e Dodro o balance do INE na comarca de Sar é máis negativo, con 181 habitantes menos.
Único balance positivo
Todos os municipios cabeceira de comarca, salvo Ordes, experimentaron un destacado retroceso demográfico. O máis importante, tras Padrón, deuse en Arzúa, con 70 veciños menos, xunto a Melide e Santa Comba, que mantén unha tendencia moi negativa, xa que desde o ano 2010 perdeu 958 habitantes. O recorte máis suave foi en Negreira, con seis veciños menos, pero a cabeceira barcalesa non sae desde hai anos dunha senda negativa que provoca que desde o 2013 teña perdido 114 habitantes censados.
Fronte a estas diminucións, a comarca de Santiago sobrevive ao lastre da capital e dos concellos de Boqueixón, Vedra e Val do Dubra, xa que guinda unha resultante positiva de 501 persoas.