O deporte compostelán mostra a súa cara máis solidaria no I Memorial Jesús Pampín
SANTIAGO
O triatleta olímpico Iván Raña saíuse da súa disciplina para facer o saque de honra no torneo de fútbol 8 disputado no campo de Santa Isabel
28 jun 2026 . Actualizado á 05:00 h.O triatleta olímpico Iván Raña saíuse da súa disciplina para darlle unha patada ao balón no campo de Santa Isabel. El encargouse do saque de honra no I Memorial Solidario Jesús Pampín, que mostrou a cara máis solidaria do deporte compostelán para recadar fondos nun torneo de fútbol 8 a favor da Fundación Andrea.
A súa presidenta, Charo Barca, agradeceu ao PP de Santiago a organización desta cita e a xenerosidade de todas as persoas que participaron nela para apoiar o labor que realizan con nenos enfermidades crónicas, de longa duración ou terminais. A recadación deste evento en concreto, matizou, será destinado a reforzar o traballo que desenvolve a entidade na humanización de espazos pediátricos, nas súas casas de acollida en Santiago e no financiamento de sesións de fisioterapia, logopedia e atención psicolóxica a menores.
«O mellor resultado desta xornada é comprobar que Santiago sabe responder cando se trata de axudar aos demais», dixo o portavoz do PP de Santiago, Borja Verea. E, Almudena Pampín, como representante da familia do homenaxeado no memorial, deu as grazas a todas as persoas que o fixeron posible e desexou que se poida repetir en futuras edicións. Esta é a vontade da organización, tal e como ratificaron onte, cando se explicou que o torneo naceu coa vontade de consolidarse como unha cita anual e converterse nun referente solidario na cidade, á vez que se lembra a figura de Jesús Pampín, moi vinculado o deporte e á vida pública compostelá.
Un partido amigables entre un equipo de xornalistas e outro de políticos completou a xornada e puxo a nota de cor a un torneo no que reinou o compañeirismo e un ambiente distendido. A guinda púxoa a entrega de trofeos aos equipos e xogadores máis destacados. O premio ao mellor xogador foi para José M. Bonome, e Natalia Palmou gañou o de mellor xogadora. O Barceló FC foi distinguido co Trofeo ao Equipo Máis Deportivo e gañador do memorial. O resto da clasificación pechouse co Rías Baixas CF no segundo posto e o “Aston Birras” como terceiro clasificado.
Desde a organización lembran que a fila cero a favor da Fundación Andrea permanecerá aberta durante toda a próxima semana para que as persoas interesadas que non puideron asistir ao torneo teñan a oportunidade de colaborar igualmente a través do Bizum de Donativos 00908.