O veterano pivote serbio superou nas votacións a Barcello e a Balvin
13 may 2025 . Actualizado á 14:07 h.O veterano Oliver Stevic (1984) foi elixido pola afección obradoirista como o mellor xogador de abril, un mes no que a actividade do equipo foi máxima coa disputa de seis partidos: Cantabria, Morón, Palencia, Real Betis Baloncesto, Alacante e Fuenlabrada. Stevic foi o máis brillante no total destes encontros cun 40% dos votos. O segundo posto foi para Álex Barcello, cun 37,5%. O terceiro foi Ondrej Balvin, cun 22,5%.
Sobre o premio, o pivote serbio sinala que lle está moi agradecido «a toda a xente que participou na votación e recoñeceu o meu traballo, que vai máis aló das estatísticas. Non é só un traballo meu, é de todo o equipo, que fisicamente está moi ben».
17 créditos fronte ao Fuenlabrada
A mellor actuación do pivote foi na derrota fronte ao Fuenlabrada (84-68). O serbio anotou 12 puntos en 24 minutos, ademais de capturar oito rebotes e dar catro asistencias. Acadou unha valoración de 17 créditos, nun duelo no que foi o máximo anotador do equipo por diante de Faggiano (11) e Barcelo (10). O veterano obradoirista asinou outra boa actuación no triunfo a domicilio sobre o Morón (70-99). Rexistrou 13 créditos de valoración grazas aos seus 10 puntos e catro rebotes en 15 minutos de xogo, nun partido no que Millán Jiménez foi o máximo anotador con 18 puntos.
No decisivo choque de Sar fronte ao Palencia, o máximo rival do equipo na loita pola quinta praza, Stevic colaborou na vitoria do conxunto galego (77-76) con tres puntos e un rebote nos 14 minutos que estivo en pista, con cinco créditos de valoración. O principal anotador do Obra neste enfrontamento foi Brad Davison, con 14 puntos. Nun dos triunfos máis brillantes do Obra no que vai de tempada, na pista do Real Betis Baloncesto (77-78), o veterano pivote participou durante 15 minutos, cun balance de dous puntos, tres rebotes, unha asistencia e catro de valoración. O máximo protagonista deste encontro foi Barcello, con 20 puntos.
Máis vitorias
No cómodo triunfo na capital galega ante o Alacante (82-70), Stevic concluíu a súa participación con seis puntos en 21 minutos, acadando cinco rebotes, dúas asistencias e 11 de valoración. Micovic foi o máximo anotador con 15 puntos. O Obradoiro arrincou o mes de abril coa disputa do partido suspendido na pista do Cantabria, que resolveu case sen baixar do autobús (58-85). O pivote contabilizou dous puntos e tres rebotes en 14 minutos. Sumou sete créditos de valoración nun choque no que destacou Quintela, con 16 puntos.