O escolta canadense regresou a Sar na décima xornada, con tempo suficiente para subir o nivel dun equipo que volveu namorar a unha afección envorcada
28 may 2023 . Actualizado ás 20:56 h.Kassius Robertson (Toronto, Canadá, 1994) volveu ser a estrela do Obradoiro nunha tempada na que o equipo cumpriu con satisfacción e boa nota o obxectivo da permanencia, o título que cada curso se xogan os composteláns na Liga Endesa. O canadense brillou de novo e levou ao equipo de Moncho Fernández cara ao éxito, mesmo semanas antes de concluír a fase regular.
Polo camiño quedaron outros obxectivos maiores, premios extra que satisfán a calquera deportista. Clasificarse para a Copa do Rey ou para o play off polo título son metas de difícil xestión e de complicada execución. Case misión imposible para os máis humildes. Os obradoiristas estiveron preto, moi preto de tocar coa palma da man un reto que está destinado aos grandes presupostos e aos de clase máis alta. Pero un ano máis, o Obra competiu en inferioridade de condicións e paseouse con todas as honras ante auténticos equipazos.
Robertson foi o líder, pero non foi o único. O vestiario é o que fortalece cada curso este proxecto, independentemente das individualidades de xogadores que son clave no éxito como o escolta canadense, os irmáns Scrubb ou Dragan Bender, que por lesión non puido acadar o nivel que lle serviu de trampolín para atopar un destino máis enriquecedor economicamente.
Robertson volveu ser protagonista en moitas das estatísticas da Liga Endesa, relacionándose e discutíndolle o protagonismo a grandes xogadores, deportistas que asombran e brillan por toda Europa. O canadense foi líder en puntos na ACB, con 17,4 por partido, avantaxando a estrelas como Harding (Manresa), con 16,2; Howard (Baskonia), 16,1; Dzanan Musa (Real Madrid), 14,7; e Taylor (Bàsquet Xirona), 14,5.
En triplos acabou en terceira posición, con 2,6 tiros de tres por xornada, só por detrás de Markus Howard (Baskonia), con 3,2; e de McFadden (Murcia), 2,9. En tiros libre foi segundo, con 4,1 por encontro, só superado por Giorgi Shermadini (Tenerife), con 5,1.
O 30, indiscutible para Moncho Fernández desde a décima xornada, foi o segundo xogador da liga con máis presenza nas canchas de xogo, cunha media de 28 minutos por xornada. Máis nada que foi superado por outra das estrelas do Obradoiro, o seu compatriota Thomas Scrubb, con 30 por partido. O seu irmán Phil ocupou o segundo posto en acerto en tiros libres, cun 90,8 % de efectividade. Só lle superou Mirotic (Barça).