A hostalería de Santiago estreou os seus novos horarios con calma e máis sobremesa

A noite compostelá está cada vez máis preto: o último alivio de restricións devolveulle unas cantas horas á hostalería, mentres que a súa clientela lembra aos poucos o sabor das sobremesas. Esas son as sensacións que quedaron despois da primeira fin de semana sen estado de alarma, cos bares traballando ata as once e os restaurantes ata a unha. «Abrimos o sábado e de afluencia foi como o que estabamos tendo, só que con dúas horas máis», sinala Martín Calviño, do Riquela, que dá conta dunha calma en Santiago que nada tivo que ver coas aglomeracións doutras cidades como Madrid ou Barcelona.

Máis do mesmo viviuse o sábado e tamén o domingo no Pub Atlántico. «Todo foi igual de controlado que cando pechabamos ás nove. Ao final o aforo é o mesmo, só que tes algo máis de tempo para traballar», explica a súa dona, Pilar Fernández, que destaca a cantidade de descoidados que non eran conscientes dos novos horarios. «Moita xente aínda non o tiña asimilado e quedaba sorprendida», engade Fernández. Na súa opinión, o descontrol da xente pode estar na rúa ou xa no ámbito privado, pero «nos bares hai unhas normas e un control».

As sensacións nos restaurantes foron parecidas, cando non iguais, que nos bares. A noite do sábado tamén foi tranquila para O Dezaseis, na rúa de San Pedro, segundo conta o seu responsable Avelino Martínez. «Parte da clientela non sabía que podía estar ata a unha. As mesas das 21.30 alongaron algo máis e as últimas que entraron foron as das dez e media, que xa sabían do novo horario», apunta Martínez, que tamén viviu un arranque tranquilo e que cre que «isto para o que vale é para recuperar conversas e sobremesas».

---

---

---