Máis de 2.000 persoas vacinaranse esta fin de semana en Santiago contra o covid
SANTIAGO
Este domingo están citadas 1.133 maiores e grandes dependentes
04 abr 2021 . Actualizado ás 05:00 h.A vacinación contra o covid non parou ao longo desta semana Santa. A área sanitaria de Santiago citou para estes días a un total de 11.950 persoas para vacinarse en distintas localidades. Para esta fin de semana hase contactado con 2.333 residentes no ámbito compostelán: onte había previstas 1.200 doses de Moderna para maiores de 80 anos -a metade no Clínico e a metade en Conxo - e para hoxe 1.133 -900 para maiores e 233 para grandes dependentes, que recibirán a súa segunda dose-.
Mañá hai medio milleiro de persoas citadas no Clínico para ser vacinadas con AstraZeneca e tamén se retomará a inmunización en máis puntos de vacinación da zona, que pararon de inxectar durante esta fin de semana. O xoves había 120 persoas citadas en Melide; 125 en Arzúa; 120 en Negreira; e 134 en Ames, a vacinarse no Milladoiro, onde se chamaron a outras 136 ao día seguinte. O venres fíxose o propio con 117 en Padrón; e con 121 en Ordes.
Evolución do virus
En canto á situación epidemiolóxica, a área sanitaria acada os 283 casos activos e suma seis días de subidas. Segundo os datos facilitados onte polo Sergas, os novos positivos rexistrados foron 19 e os hospitalizados totais son 20, dos que tres reciben coidados intensivos no Hospital Clínico.
Os curados ata a data son 17.917, as PCR realizadas chegan ata as 309.710 e a taxa de positividad é do 5,37 %, quedando así lixeiramente por amais do cinco recomendado pola Organización Mundial da Saúde (OMS) para ter a situación baixo control.
En comparación con outras áreas sanitarias, a de Santiago é a única na que aumentan os casos activos respecto ao día anterior. Con máis positivos estarían a da Coruña (719) e Vigo (605), mentres que con menos están Pontevedra (230), Ourense (144), Lugo (139) e Ferrol (103).
Por concellos, Santiago cidade mantense estable: a súa incidencia a 14 días é de 69 casos por cen mil habitantes, e na última semana ha rexistrado 26 novos contagios. A incidencia de Ames é de 68 casos e a propagación crece lixeiramente (dos 22 positivos das últimas dúas semanas, 14 producíronse nos últimos sete días), mentres que Teo se mantén estable nos 59 por cen mil habitantes. O parte de falecidos emitido onte polo Sergas inclúe a unha muller de 88 anos que estaba ingresada no CHUS e tiña patoloxías previas.