As novas multas acaban coas ganas de festa en pisos: as dos xoves baixan un 76,5 %
SANTIAGO
A noite tradicionalmente máis complicada acumulaba unha media de 17 sancións, pero a última xornada baixou a só catro
02 dic 2020 . Actualizado ás 20:17 h.As novas e moito máis severas multas por organizar festas en pisos parecen ter logrado o efecto que buscaba o Concello de Santiago: disuadir aos mozos, especialmente aos universitarios, de organizar este tipo de reunións porque supoñen un grave risco de contaxio por coronavirus. As novas sancións, que chegan aos 750 euros, entraron en vigor na noite do xoves 15 ao venres 16 e xa provocaron unha baixada do número de expedientes abertos, xa que os dez daquela xornada son a metade dos vinte que se tramitaron a semana anterior e moitos menos que os 28 do 24 ao 25 de setembro -outra noite de xoves-, a marca ata a data.
As noites dos xoves acostuman ser as máis conflitivas porque é nas que máis universitarios saen en Santiago, por iso é polo que sexa moi significativo que esta semana só se sancionasen a catro pisos por organizar festas. É un 76,5 % menos que a media do último mes, que é de 17 multas os xoves.
Desas catro sanciones da noite do 22 ao 23, tres son de 500 euros porque as festas foron descubertas máis aló da medianoite pero antes das 3 horas. O responsable da cuarta, que foi a partir desa franxa, terá que abonar 750 euros.
O concelleiro de Seguridade Cidadá de Santiago, Gonzalo Muíños (PSdeG-PSOE), non quere lanzar as campás ao voo e, aínda que se alegra de que as festas en pisos nas noites dos xoves «si que estean a baixar e bastante», advirte que estará moi atento «para ver que sucede esta fin de semana», sinala.
O edil foi, precisamente, o promotor do endurecemento das multas, que aínda que sancionan o exceso de ruídos o que de verdade buscan é limitar os contactos sociais perigosos.