O central zurdo recoñeceu na súa presentación que o proxecto do conxunto branquiazul agradoulle desde o primeiro momento
25 sep 2020 . Actualizado ás 22:17 h.O defensa central Guille Torres, que foi presentado na mañá de onte como novo xogador do Compostela, xa realizou o seu primeiro adestramento cos seus novos compañeiros. Nas súas primeiras palabras como branquiazul, o futbolista comentou que chega «moi ben fisicamente» e explicou que desde o primeiro momento falou co preparador física para avaliar o seu estado: «Este verán non parei, estiven activo e adestrando pola miña conta. E veño con moitas ganas de arrincar a liga e de sumar. Queremos chegar a lume de biqueira e prepararnos ben neste mes que queda de pretemporada».
Sobre a súa fichaxe polo Compos, Guille Torres lembrou que «coa primeira persoa coa que falei foi con Manuel Castiñeiras, o director deportivo. Podo dicir que o proxecto que me mostrou chamoume a atención desde o primeiro contacto. O Compos é un club histórico, que conta con grandes instalacións. A verdade é que todo o que teño que dicir son palabras boas».
O futbolista recoñeceu na súa presentación que se atopa «máis cómodo» como central zurdo, aínda que explicou que «o ano pasado xa xoguei algúns partidos de lateral e tamén de pivote defensivo». Analizando un pouco a nova tempada, o defensor apuntou que «este ano será diferente porque se vai crear a nova Segunda B. Nós temos un subgrupo moi complicado, pero polo pouco que vin ata agora do equipo podo dicir que non somos menos que ninguén. Seguro que estaremos na pelexa».
Guille Torres subliñou que vén sumar, sexa en minutos, en frescura, pola idade que teño, e para intentar contar coa confianza do adestrador desde o primeiro momento». Estivo na canteira do Espanyol e lembra a eliminatoria de ascenso que o Compostela disputou ante o conxunto catalán: «Desde aquel enfrontamento teño moitas máis referencias do Compostela. Neste ano e medio ou dous anos, e sobre todo despois da chamada de Manuel Castiñeiras e da miña contorna, empeceime a dar conta da grandeza deste club».
O novo central de Yago Iglesias explicou que por agora non falou con ninguén dos obxectivos do equipo. Acaba de aterrar e aínda lle queda un tempo de adaptación e de traballo. «Non falamos de obxectivos. A idea de todos é devolver ao Compostela canto antes onde merécese. Pola súa historia merécese estar máis arriba. Agora, coa nova categoría ten que dar o salto, pero é certo que non falamos nada nestes primeiros contactos. Pero eu son da idea de que hai que mirar ao grande e pensar en loitar polos postos de arriba, por estar o máis alto posible».
Sobre a súa chegada á capital galega, Guille Torres apuntou que «nestes dous ou tres días xa coñecín un pouco a cidade e aos compañeiros. Tamén fixen un pouco de turismo e integreime un pouco máis na cidade. Tiña algunhas referencias de Santiago pola miña familia, pois estivo uns anos vivindo aquí. Eu nunca estivera en Galicia, pero o pouco que puiden ver xa me encantou».