Traballa en Rois, mentres en Padrón volve acumularse maleza
19 ene 2020 . Actualizado ás 12:37 h.Augas de Galicia está limpando as beiras do Sar no tramo interurbano do municipio de Rois, a partir da ponte da Meana, onde xa retirou algunhas ramas caídas nas marxes do río. De acordo co organismo da Xunta, esta actuación é periódica e forma parte dos traballos que realiza nas denominadas Áreas con (ARPSIs), Risco Potencial Significativo de Inundacións como pode ser a zona da Meana ou Lamego, en Rois.
Estas tarefas de limpeza, engade Augas de Galicia, tamén se executan nos tramos interurbanos doutros municipios, como é o caso de Padrón, onde se fixeron os mesmos traballos cara a finais de verán e prolongáronse ata o outono. No entanto, a día de hoxe xa poden verse troncos no Sar á altura da ponte nova de Iria, que puido arrastrar a corrente, e mesmo ramas depositadas desde hai moito tempo xunto á ponte vella, informa o grupo socialista de Padrón.
As tarefas de «mantemento xornal» que leva a cabo Augas de Galicia céntranse na retirada de árbores mortas e madeira acumulada, así como outros elementos susceptibles de causar tapóns, ademais de rozas selectivas puntuais.
En Rois, o goberno local acaba de rexeitar unha proposta do grupo socialista que pedía a limpeza das beiras dos ríos, ao entender que xa se está facendo, polo menos no Sar. A maiores, o alcalde, Ramón Tojo , informou de que o Concello ten solicitado o acondicionamento das marxes do río Rois, no que está habilitado un coto de pesca.