Turismo renovará o Centro Superior de Hostalería cun investimento de 2,2 millóns
SANTIAGO
O complexo acollerá a partir do 2021 un novo grao da USC sobre gastronomía e xestión hostaleira
21 sep 2019 . Actualizado ás 05:00 h.A partir do próximo ano, o Centro Superior de Hostalería de Galicia experimentará varios cambios substanciais como resultado do novo plan de renovación integral que promoverá a Consellería de Cultura e Turismo. En total, a Xunta destinará 3,5 millóns de euros a este proxecto, dos que 2,2 irán á reforma do complexo e que se licitarán de xeito inmediato», segundo apuntou o conselleiro desta carteira, Román Rodríguez. A isto hai que sumarlle a adscrición do centro á Universidade de Santiago, que co comezo do curso 2021-2022 impartirá un dos seus novos graos, Innovación Gastronómica e Xestión Hoteleira, aínda que manterá a súa condición de entidade privada.
A reforma integral do actual Centro de Hostalería, que se executará nuns cinco anos, implicará unha importante mellora para o seu mantemento e para o consumo enerxético das instalacións, que segundo os datos achegados por Román Rodríguez, permitirán aforrar ata 446.000 euros anuais durante os próximos dez anos. «Despois de tanto tempo, o centro reclamaba unha obra como esta», puntualizou o conselleiro.
Respecto da implantación do novo título que se ofertará no 2021, Rodríguez destacou que «vai ser un grao cunha dimensión moi dual, pola súa implicación co sector privado», unha característica que destacou especialmente como forma de «fortalecer os vínculos entre os centros formativos e o destino final dos alumnos de hostalaría, que sen dúbida será o sector turístico». Pola súa banda, Victoria Otero Espinar, vicerreitora de de Titulacións a USC, subliñou durante a presentación do plan que este grao de terá Innovación Gastronómica e Xestión Hoteleira por obxectivo «ofrecer unha formación máis solvente e sólida que prepare mellor aos futuros profesionais do sector».
O conselleiro de Cultura e Turismo tamén adiantou un dos puntos adheridos ao plan da Xunta, que expón a creación dun viveiro de empresas co Centro Superior de Hostalería como eixo da iniciativa. «Aquí debemos formar a profesionais para que se unan a proxectos empresariais, que se lles faciliten vías a estes posibles emprendedores», argüiu Román Rodríguez sobre esta proposta, que describiu como a creación de «un lugar no que se poida dinamizar a actividade emprendedora».
Pola súa banda, Cesáreo Pardal, presidente do Clúster de Turismo de Galicia, destacou a dedicación da consellería, a USC e o Centro Superior de Hostalería pola súa aposta na mellora do sector, con especial detemento nas súas implicacións para o ano santo. «O Xacobeo é un grande escaparate para o sector e nos próximos dez anos, a partir do 2021, imos ser un grande escaparate cara o mundo», apuntou Pardal. Tamén resaltou que, do mesmo xeito que a apertura do Centro de Hostalería en 1994 redefiniu ao sector en Galicia, «formando ata a actualidade a 2.500 novos empresarios», este novo plan «debe abrir paso á última xeración e que traballe xunta para cambiar de novo ao sector».