Panut terá que agardar á segunda volta para debutar na liga española
19 sep 2019 . Actualizado ás 05:00 h.O Santiago Futsal presentou ás súas últimas dúas incorporacións para a tempada 2019-2020. Os tailandeses Panut Kittipanuwong e Peerapat Kaewwilai, que estiveron acompañados polo presidente do club, Ramón García Seara, realizaron as súas primeiras declaracións como xogadores do conxunto branco.
Os dous futbolistas chegaron ao Santiago Futsal procedentes do Chonburi Bluewave, equipo da cidade de Bangkok e que milita na Thai League. Ambos os xogadores seguen o camiño que iniciaron Muhammad Osamanmusa e Ronnachai Jungwongsuk hai uns anos na capital galega. Panut Kittipanuwong e Peerapat Kaewwilai levan desde mediados de agosto en Compostela e xa están totalmente integrados na disciplina do club. Tiveron unha boa e cómoda adaptación.
Peerapat é un pivote que naceu en 1996. Levará nas súas costas o dorsal número 20. Xa ten a licenza tramitada, polo que o adestrador do primeiro equipo, David Rial, poderá contar con el desde a primeira xornada de liga. Na súa presentación, o novo xogador branco recoñeceu que está «moi agradecido» por esta oportunidade de xogar no Santiago Futsal. «O meu ídolo sempre foi Betao. Vinlle xogar por primeira vez na Copa de España do 2006. Desde aquel momento, o meu soño sempre foi xogar en España. É unha gran honra estar agora na súa exequipo».
Pola súa banda, Panut é unha á nacido en 1998. A pesar de formar parte da disciplina do club, o xogador tailandés non terá ficha federativa ata a segunda volta. O número 7 do Santiago Futsal sinalou na súa presentación que está «moi contento e emocionado por formar parte» do conxunto compostelán, «un club que foi campión de Europa». Ao mesmo tempo, apuntou que «cando teña a oportunidade de xogar por este club vou dar o máximo. Vai ser todo un desafío e agardo estar á altura».
O máximo mandatario do Santiago Futsal, Ramón García Seara, subliñou que «con estas incorporacións o club garántese un salto de calidade a nivel deportivo e tamén reforza a súa imaxe e a súa presenza en Asia». O dirixente quixo agradecer ao Chonburi Bluewave e «en especial» a José María Pazos. Pulpis, «a colaboración para levar a cabo estas dúas fichaxes». Ramón García agarda que tanto Panut como Peerapat «poidan sacar todo o seu fútbol sala connosco e demostren a súa calidade moi pronto. Grazas a eles e ás escolas Santiago Futsal Talent Factory o club ten cada vez máis peso no continente asiático».