Chegou a San Lázaro fai dous veráns procedente do Fabril
21 jul 2019 . Actualizado ás 05:00 h.O Compostela, que en principio pechara o capítulo de altas, terá que modificar os seus plans. Yago Iglesias quere un defensa central máis, algo que non descarta o director deportivo Manuel Castiñeiras, que agarda para ver como se pon o mercado durante as próximas semanas. Con todo, os últimos acontecementos obrigarán ao conxunto branquiazul a buscar novos reforzos. O corpo técnico necesita un lateral esquerdo.
Álvaro Naveira non seguirá no Compostela a próxima campaña. O lateral zurdo solicitou a baixa para aproveitar unha oferta dun equipo de superior categoría. O Pontevedra hai días que vén interesándose polo xogador. Por iso, e recoñecendo o esforzo e o compromiso do futbolista durante os últimos anos, o Compos aceptou a solicitude de Naveira, que se comprometeu co Pontevedra para as dúas próximas tempadas.
Naveira chegou ao Compos fai dous veráns procedente do Fabril, asentándose rapidamente no carril esquerdo. Foi o único futbolista puro para esa demarcación e converteuse nun fixo das aliñacións de Yago Iglesias . No primeiro curso, disputou 35 encontros oficiais (2.931 minutos), todos eles como titular, nun equipo que quedou campión de liga. Ademais, foi o autor do único tanto na eliminatoria final do play off ante o Salmantino, o seu único gol como branquiazul. Na súa segunda campaña en San Lázaro participou en 34 partidos (2.362 minutos), partindo no once inicial en 29 ocasións.