Familias desta parroquia de Padrón mobilízanse para que a escola non perda unha aula e unha das dúas prazas de docente
24 may 2019 . Actualizado ás 08:14 h.As familias da parroquia de Carcacía, en Padrón, continúan con accións para evitar que a Consellería de Educación unifique os niveis de infantil e primaria da escola unitaria, o que implica suprimir un aula e unha praza de docente. Así, tras a recollida dunhas 1.200 firmas de apoio ao actual modelo educativo da escola e tras solicitar o apoio do Concello, os afectados teñen o compromiso de seis familias da parroquia, con seis fillos, de que nos próximos anos matricularanos neste centro educativo de Carcacía, o máis próximo aos seus lugares de residencia e que, ademais, conta con moitos servizos, incluído transporte escolar.
Con iso, as familias falan de que «hai previsión de matrícula para a escola», polo que están en contra da proposta da consellería de suprimir unha aula e unha das dúas prazas de docente, nunha escola unitaria que imparte os niveis de infantil e primaria e que é das poucas que quedan no rural con este modelo.
Non entenden a medida nun centro que, segundo explican, ten boas instalacións e equipamento, froito da «extraordinaria inversión pública que hai feita». Para facer visible a súa demanda organizaron unha semana de portas abertas na escola, para dala a coñecer a outros pais e nais e que comproben que dispón de boas instalacións e equipamento, polo que se opoñen á unificación das dúas unidades de Educación.