O centrocampista azul e branco aposta por minimizar os erros porque «no play off poden ser definitivos»
24 may 2019 . Actualizado ás 05:00 h.O Compos se apresta a encarar a promoción de ascenso por segundo ano consecutivo. E un dos xogadores con máis experiencia nestas lidees é Álex Ares, que arrincou a semana con molestias nunha perna pero que confía en chegar sen maiores problemas ao partido do domingo fronte ao filial do Alavés.
O centrocampista agarda unha eliminatoria aberta entre dous equipos que queren o balón. «Imos estar pendentes de facer o noso xogo -explica- e imos ver que pasa».
Ao botar a vista atrás e lembrar a traxectoria da pasada campaña, na que o Compos caeu ante o filial do Español pero entrou na repesca por ter sido campión de Liga , apeou con moitos apuros ao Terrassa e cedeu ante o Salmantino cando tiña moi preto o ascenso en San Lázaro, tras empatar na ida a domicilio, Álex Ares aposta por aprender da experiencia, do positivo e do negativo: «O importante é madurar». Indo un pouco máis ao detalle, pon o acento en «aspectos defensivos, non conceder ocasións». Sobre todo, di que hai que minimizar os erros porque «no play off poden ser definitivos».
Confía en que as experiencias do pasado curso axuden e sirvan como base para afrontar con máis garantías o novo desafío.
Identidade
Cando se lle pregunta pola importancia de marcar a domicilio, o xogador do Compostela subliña que o equipo «sempre sae a gañar». É a súa identidade.
Ás veces, ese xeito de envorcarse sobre a portería rival pasoulle factura ante rivais que apostan por un fútbol máis directo, con poderío físico, que saben agardar e saír á contra.
Álex Ares recoñece que a batalla física é complicada, polas cualidades do persoal do Compos. «Somos un equipo ao que lle gusta a pelota -sinala- e temos que aprender diso, saber rearmarnos cando a ten o rival e aprender de erros pasados».
Do Alavés B subliña que dispón dun cadro de persoal de «xogadores tecnicamente ben dotados e que no aspecto físico son corpulentos. É un equipo moi completo. Creo que na nosa Terceira daría bastante que falar. Podería comparalo cun Racing de Ferrol, porque foi feito para ser primeiro».
En canto á orde de partidos, apunta que «toda a xente di que é mellor o primeiro fose e a volta en casa. O mellor é pasar a eliminatoria, e dá igual se é fose ou en casa». O que quere é «traer un bo resultado» e facelo valer no Vero Boquete co apoio da bancada.