Lorenzo, que se danou un cóbado e traballa á marxe do grupo, é dúbida para o domingo
15 feb 2019 . Actualizado ás 05:00 h.Yago Iglesias non quere pensar máis aló do partido deste domingo ante o Paiosaco. Tampouco é partidario de facer cábalas. O único que lle preocupa é que o colectivo chegue nas mellores condicións posibles á seguinte cita. E esta semana ten a dúbida de Lorenzo, que se danou un cóbado nun adestramento e traballa á marxe do grupo.
Samu, que forzou para xogar na Grela e que acabou con pequenos problemas físicos, onte puido traballar ao mesmo nivel que os seus compañeiros. E Aythami, sancionado, será baixa.
A planificación do traballo prevé para hoxe unha xornada de descanso e será na sesión do sábado cando o porteiro saiba se ten opcións de entrar na lista. Parecen escasas e, se finalmente se cae da convocatoria, ocupará o seu posto o xuvenil Álex, que traballa habitualmente co primeiro equipo.
O técnico azul e branco ten un alto concepto do próximo rival e do seu adestrador, Juan Ribeiro. Non dubida en cualificar ao Paiosaco como a revelación da primeira volta, por máis que en 2019 aínda non coñeza a vitoria. Lembra que é o último colectivo que foi capaz de dobregar ao Racing de Ferrol, que vén de perder no campo do Bergantiños nun duelo que se decidiu ao final e que puido caer para calquera lado, e que entre as súas vitorias a domicilio figura a que logrou no feudo do Ourense C. F..
Yago Iglesias agarda a un Paiosaco que, salvo nun par de excepcións, sempre apostou por unha defensa de cinco, con tres centrocampistas e dúas puntas. Subliña que Juan Ribeiro é partidario de facer bastantes cambios no once inicial dunha xornada para outra e que o colectivo está moi por amais das individualidades.
Non quixo anticipar se o Compos tamén seguirá xogando con tres centrais, pero todo apunta a que así o fará, sobre todo tendo en conta que recupera a David Uña e Piscu.
Os ecos da vitoria ante o Silva
A vitoria do Compos na Grela deixou eco no Silva. O penalti e a posterior expulsión de tres futbolistas (a Lorusso caeron catro partidos de sanción) supuxeron unha cara factura.
Yago Iglesias non quixo entrar en polémicas: «Entendo o malestar pola forma na que perden, porque están moito tempo en vantaxe. E, sobre todo, polo que falaba con Bardanca ao final, por perder a tres xogadores moi importantes para eles ante o Arousa. Sendo egoísta, a min tamén me vén mal, porque o Arousa é un equipo que está aí connosco».
Xogada indiscutible
En opinión do técnico azul e branco, o penalti non ofreceu dúbida algunha. E tamén indicou que «a xente que foi ver o partido pode dicir que ao final o fútbol foi xusto, porque o Compostela o intentou de todos os xeitos. O fútbol, unhas veces dáche e outras che quita. Se cadra, eles tiveron partidos que gañaron e ao rival pareceulles inxusto ese resultado».