Álex Ares abriu o marcador e Juan Antonio empatou con polémica no 92
14 ago 2018 . Actualizado ás 23:51 h.O Compos adxudicouse cópaa Deputación na quenda de penaltis, despois de que o partido acabase en empate a un gol. Foron necesarios once lanzamentos, incluídos os dos porteiros. O de Lorenzo entrou pola escuadra. O de Diego Rivas foise ao traveseiro.
Os dous equipos teñen claro a que queren xogar. O Racing aposta máis pola física, o Compos pola química. O colectivo de Larraz aperta na presión, sempre que pode moi arriba, con moitas axudas e as liñas xuntas. Cando recupera o balón trata de chegar o máis rápido arriba, ben con centros á área ou balóns longos ás dúas torres, Joselu e Juan Antonio, ben con diagonais cara a Marcos Álvarez. O Compos combina máis, mesmo co porteiro. Non lle pesa a posesión.
Con esas premisas, viuse unha primeira parte na que os de Yago Iglesias tiveron máis tempo o balón nos pés, pero case sempre moi lonxe da portería de Diego Rivas. Tivo as súas mellores opcións nun par de lanzamentos afastados de Álex Ares e Samu e nun par de incursións de Miki na área. Nunha enredouse e na outra xutou en posición forzada.
O Racing apenas pisou a área de Lorenzo, salvo en accións a balón parado. Pero foi o que tivo a ocasión máis clara para inaugurar o marcador, no minuto 35. Marcos Álvarez cazou un balón na área, virouse e enviou ao poste.
A cinco minutos para chegar ao descanso, Álex Ares desfixo as táboas. Xutou desde a semiluna e Diego Rivas, a quen lle botou o balón diante, non estivo fino.
A pesar de verse por detrás no marcador, o Racing non cambiou o manual. Alongou algo as posesións, pero sen crear apenas perigo.
O Compos seguiu mostrando un maior manexo de balón. Nos compases iniciais, Miki Villar foi derrubado ao bordo da área cando enfilaba a portería de Diego Rivas. Eran os mellores minutos do Compos.
O partido entrou nunha fase de moito centrocampista e animouse nos compases finais, cando o Racing empurrou con máis corazón que cabeza.
O empate chegou con polémica. Primeiro, o árbitro concedeu córner nun balón que deixara saír un defensor do córner. Despois, o Compos pediu falta sobre Saro, no primeiro pau. E Juan Antonio non perdoou.
Así chegou aos penaltis, con 4.000 euros en xogo. O campión leva 8.000 e o subcampión, a metade.
