O internacional belga afirma que chega ao conxunto de Moncho Fernández «moi emocionado»
04 ago 2018 . Actualizado ás 23:37 h.A á-pivote belga Maxime de Zeeuw mostrou o seu compromiso co Obradoiro para as dúas próximas tempadas. Trátase da última incorporación ao persoal do equipo, tras as xa anunciadas do grego Kostas Vasileiadis e do alemán Andreas Obst. O xogador di que chega ao conxunto de Moncho Fernández «moi emocionado» e declárase, ademais, seguidor acérrimo da Liga Endesa.
Os xogadores Mickey McConnell e Ben Simons foron determinantes para o visto e prace de De Zeeuw. Así o asegura o belga, quen afirma que ambos os compañeiros lle falaron moi ben do club: «Dixéronme que atoparei unha nova familia e isto é algo moi importante para min», sinala a á-pivote. Tamén resalta a súa admiración e o compañeirismo que sente polo seu adestrador: «Moncho Fernández faloume da filosofía do club e do equipo e encantoume», apostila.
De Zeeuw agarda que a súa achega ao Obradoiro durante as próximas campañas sexa a máxima ao seu alcance. O belga considérase a si mesmo «un xogador de equipo» que vai tratar de achegar todo o posible para gañar». Tamén aposta a á-pivote por que na súa estancia no club compostelán poida mostrar a totalidade das súas habilidades, que son, nas súas propias palabras, «tirar, xogar ao poste e botar cara ao aro».