Os coreanos prefiren o Camiño Francés e cando chegan como turistas utilizan as ligazóns de Múnic e Frankfurt
06 jun 2017 . Actualizado ás 05:00 h.O Camiño de Santiago está presente na cidade de Seúl como un dos destinos ofertados polas axencias turísticas para aqueles que optan por viaxar a Europa durante os seus períodos vacacionais. O Camiño véndese como unha opción de tranquilidade, de contacto coa natureza, e tamén como destino cultural.
Incolsa vén realizando desde hai algúns anos un esforzo promocional para atraer turismo do Xapón, China e Corea. O pasado ano, Santiago levou a cabo en febreiro unha promoción en Seúl, que consistiu en reunións de traballo directamente con axencias e turoperadores; en setembro, Incolsa estivo na feira Jata de Tokio, e en outubro asistiu á ITB Asia, en Singapur , considerada como a primeira feira de turismo asiático. Estas campañas, e as que se realizaron en anos anteriores, están dando os seus froitos, a xulgar polos datos.
Corea é, despois de Estados Unidos, o segundo país non europeo que máis peregrinos achega ao Camiño de Santiago. De Corea chegaron o pasado ano 4.536 peregrinos, o que sitúa a este país no oitavo posto detrás de Italia, Alemaña, Estados Unidos, Portugal, Francia, Irlanda e Reino Unido.
A evolución de Corea foi espectacular nos últimos trece anos. No 2004 chegaron 18 peregrinos de Corea e 257 do Xapón. Trece anos despois, Corea achegou 4.536 peregrinos e Xapón, o outro mercado asiático de interese para Santiago, 1.459. Entre o 2004 e o 2016 multiplicouse por 252 o número de cidadáns coreanos que chegaron a Compostela a través do Camiño de Santiago. No 2008 foron 915 e no 2009 superáronse os mil peregrinos dese país. O salto máis importante foi no 2012, cando case 2.500 coreanos realizaron o Camiño. Desde entón, o número non deixou de multiplicarse. Os que realizan o Camiño de Santiago prefiren maioritariamente o Francés, pero xa comezan a inclinarse tamén por outras rutas menos concorridas.
Aqueles que non fan o Camiño e desprázanse a Santiago como destino vacacional chegan utilizando as ligazóns de Lufthansa procedentes de Múnic e Frankfurt. En anos anteriores, recorrían a Turkish Airlines ao viaxar facendo escala en Istambul.