Máis de dúas horas de apagamento en Aios, en Sanxenxo, pola presenza de paxaros no tendido eléctrico

Un paxaro foi o responsable dun apagamento que afectou a unha parte do rural do municipio de Sanxenxo á primeira hora desta mañá de mércores, segundo informaron fontes de Naturgy. O servizo de alertas da compaña eléctrica advertiu de que se detectou unha avaría no servizo ás 6.44 horas na zona de Aios . A través da súa páxina web, Naturgy explicaba que a avaría deixara sen subministración eléctrica a mil clientes. O problema detectouse nunha liña de media tensión aérea en Aios e a subministración eléctrica púidose repor ás 9.29 horas.  Á hora de explicar a causa da avaría, desde Naturgy comentouse que se tratou dunha incidencia causada por «a presenza de paxaros no tendido».

Como puido un paxaro deixar sen luz a unha ampla zona do rural sanxenxino? Desde Naturgy sostense que «probablemente durante o ascenso ou descenso do seu voo, o paxaro tocou coas ás dous elementos (condutor e apoio ou dous condutores), o que provoca unha diferenza de potencial que fai saltar os elementos de protección da liña». É dicir, a acción do paxaro nesas circunstancias fai que se desconecte a liña por seguridade.

---

---

---