Rueda : «O Concello de Pontevedra debería saber que todo ten un principio e un fin e que vos traballadores de Ence merecen paz»
PONTEVEDRA CIDADE
O presidente valora positivamente que a fábrica siga na ría pontevedresa e asegura que a Xunta será inflexible co cumprimento das normas ambientais e coa esixencia de investimento
08 feb 2023 . Actualizado ás 15:41 h.Ao presidente da Xunta, Alfonso Rueda, non lle pareceu nada casual que este mércores fixese un sol amplo e radiante en Pontevedra , coa temperaturas moito máis agradables que en días anteriores. Dixo que ese sol de xustiza combina co que ocorreu hai só 24 horas coa Xustiza; que o Supremo avalase que a fábrica de Ence continúe na ría de Pontevedra, en Lourizán, ata o ano 2073. Con esas palabras comezou Rueda a súa reflexión sobre o fallo xudicial ás portas do club naval da cidade do Lérez, onde interveu nunha xornada de corte económico na que participaban empresas ás que a Xunta deu axudas para contratar a persoas novas con perfís de investigadores e os beneficiarios deses contratos.
Rueda comezou sinalando que a sentenza do Supremo marca un antes e un despois para Ence, que é «moito máis ca unha empresa en Pontevedra e en Galicia». Foise aos números e falou dos máis de cinco mil empregos directos e indirectos que xera a factoría. E abordou logo as emocións. Así, dixo que lamenta profundamente «todo o sufrimento que pasaron os traballadores nestes anos nos que a empresa non tiña seguridade xurídica polos recursos presentados ante a Xustiza contra a prórroga que se lle otorgou para estar en Lourizán». E que o fallo do Supremo debe supor que estes operarios e as súas familias ao fin estreen un período de calma e tranquilidade. Iso si, consciente de que onte o alcalde de Pontevedra, Miguel Anxo Fernández Lores, prometeu seguir adiante coa loita para sacar a fábrica da ría e cualificou a sentenza de , «fracaso do Estado de Dereito»sinalou: «O Concello debería saber que todo ten un principio e un fin e que os traballadores de Ence merecen paz e tranquilidade despois de todo polo que pasaron».
Na mesma liña crítica co BNG, indicou que os nacionalistas unicamente acatan as sentenzas «que lles conveñen». E marcou unha diferenza co PSOE, socio dos nacionalistas no goberno de Pontevedra. Así, indicou: «Se ben o PSOE en todo este proceso tamén se sumou a ese acoso, tanto co allanamento como con sucesivas declaracións, agora parece que din que van acatar a sentenza». Cabe lembrar que nada máis coñecerse o pronunciamiento do Supremo, Iván Pontes, candidato socialista na cidade pontevedresa e actual portavoz municipal do PSOE, fixo un pase de páxina, dixo que acataba escrupulosamente o fallo e pasou a pedirlle a Ence que faga en Pontevedra os investimentos «que non fixo nos últimos sesenta anos». Con todo, Lores foi tallante e dixo que continuará a súa loita «por todas as vías posibles, terra, mar e aire, quero dicir, con mobilización social e con loita xudicial» para ver cumprido o soño de sacar a Ence da ría de Pontevedra. Rueda insistiu en que el non pode nin debe dicirlle ao alcalde de Pontevedra o que ten que dicir ou facer, pero que «o Supremo falou e, polo tanto, os traballadores deberían estar tranquilos».
Alfonso Rueda tamén falou das esixencias que terá a Xunta con Ence. Indicou que será totalmente escrupulosa co cumprimento das normas ambientais e de calquera tipo, como con calquera outra empresa galega. E sinalou que se lle vai a esixir que reactive os seus investimentos en Pontevedra. Concretamente, falou dos tres millóns anuais que debe dedicar ao seu plan social e que deixara en suspenso a expensas do que dixese o Supremo e se continuaba ou non en Pontevedra. Rueda , iso si, non aclarou se agora que a factoría pode quedar na ría ata o ano 2073 váiselle a pedir que levante na comarca de Pontevedra o proxecto dunha planta de fibra anunciado para o municipio coruñés das Pontes, tal e como empeza a reclamar Comisións Obreiras de Pontevedra.