Familias da escola infantil da Parda reclaman medidas urxentes ao ver aos seus fillos «en perigo»
PONTEVEDRA CIDADE
A Xunta sostén que o Concello de Pontevedra é o responsable do mantemento, mentres que o Concello alude a problemas estruturais do edificio
04 feb 2023 . Actualizado ás 14:14 h.Un chan do patio que produce queimaduras, zonas exteriores que non se poden usar ao non figurar nos planos, calefacción que non funciona correctamente, zonas sen sombra e chan de madeira no corredor da escola levantado e que pode provocar caídas. Son algunhas das deficiencias que arrastra a escola infantil da Parda, en Pontevedra. Este venres, á primeira hora da mañá, un grupo de nais e pais concentráronse diante do centro para esixir ás Administracións implicadas, Concello de Pontevedra e Xunta de Galicia, que emenden eses problemas canto antes. As deficiencias non son nin moito menos novas e xa había constancia delas en maio do 2021. As familias protestaron formando con varias pancartas unha frase moi clara: «Escola en ruínas, nen@s en perigo».
Que din Concello e Xunta? A Consellería de Política Social, departamento do que depende o Consorcio Galego de Servizos de Igualdade e Benestar, afirma que o Concello, como titular do inmoble, é o responsable do mantemento desta escola infantil. Así se establece especificamente, subliña un portavoz, no convenio para a xestión do centro asinado en decembro de 2010 entre o Concello e a Xunta, a través do Consorcio. Un acordo que está vencido e pendente de renovación. En todo caso, apunta Política Social que o réxime de financiamiento dos centros que xestiona o Consorcio está regulado agora por lei, concretamente no artigo 69 da lei 2/2017, que establece que é aplicable a todos os centros que xestione o Consorcio «exista ou non convenio en vigor, e ao ser a escola infantil da Parda un edificio de titularidade municipal, é o Concello o responsable do mantemento das instalacións, estrutura arquitectónica, etcétera».
Desde a consellería lémbrase que o xerente do Consorcio, Perfecto Rodríguez, reuniuse o pasado verán con representantes da ANPA, onde lles informou dun requirimento trasladado ao Concello en abril do 2022, co obxectivo de que se planificasen xa as actuacións.
Pola súa banda, o Concello de Pontevedra respondeu por boca do concelleiro de Benestar Social, Marcos Rey , e non do de Educación, Tino Fernández. O edil insistiu en que están a facer actuacións, como unha recente revisión da calefacción que incluíu a substitución da placa basee, pero fixo fincapé en que a escola infantil da Parda ten problemas estruturais de construción. Sobre as deficiencias do chan e unhas humidades precisou que xa foron vistas por un técnico, mentres que respecto da obra grande, dar sombra ao patio para que poidan gozar os pequenos e cambiar o chan de cemento, indicou que o proxecto estará rematado a próxima semana co obxectivo de acometer a obra no mes de agosto. Marcos Rey acusou a Xunta de lanzar «balóns fóra».