O Sergas inicia o expediente para rescindir o contrato con Ambulancias Civera en Pontevedra e O Salnés
PONTEVEDRA CIDADE
Os reiterados incumprimentos por parte da concesionaria do transporte sanitario programado e entre hospitais da área están detrás da decisión
26 abr 2023 . Actualizado ás 17:26 h.O Servizo Galego de Saúde (Sergas) acaba de iniciar o expediente administrativo para rescindir o contrato coa empresa valenciana Ambulancias Civera, adxudicataria do servizo de transporte sanitario programado e entre hospitais na área de Pontevedra e O Salnés. Os reiterados incumprimentos por parte da compaña están detrás da decisión tomada pola Administración. Ambulancias Civera desenvolve o servizo desde o 1 de abril do 2021. As críticas de usuarios, sindicatos e traballadores deixáronse sentir desde case o principio. A situación complicouse o pasado verán con atrasos inxustificados, que levaron ao sindicato médico CESM a solicitar ao novo xerente, José Flores, a rescisión inmediata do contrato.
En novembro transcendía que a concesionaria fora sancionada polo Sergas por incumprir o contrato. Impulsáronse entón reunións semanais entre as partes para analizar incidencias con vistas a mellorar o servizo. Pero non foi así. O ano empezaba con protestas do comité de empresa e co persoal encerrado en Montecelo ao non abonarse completa a nómina de decembro. Chegouse a convocar unha folga, que se suspendeu in extremis ao cobrar os traballadores. O paso dado agora polo Sergas demostra que a Administración xa non está disposta a seguir nesa liña. O expediente para resolver o contrato «por acúmulo de penalidades» comunicouse á empresa o 20 de xaneiro. Ambulancias Civera presentou alegacións.
Un dos compromisos que anunciou o propio José Flores, nada máis recalar na área como xerente, foi que se ía facer o que obriga a lei e que concretou con estas palabras: «Somos responsables de facer un seguimento exquisito do contrato». O importe dese contrato con Ambulancias Civera é de algo máis de 11 millóns de euros por tres anos. O 90 % é un canon fixo, e o restante en variables ligadas a uns parámetros de calidade (5 %) e de actividade (5 %). O contrato establece 38 vehículos, coa obrigación de dispor de 3 ambulancias uvi móbil. Na anterior concesión, de Ambulancias Pontevedra, eran 42 os coches.
