Provoca un accidente en Pontevedra conducindo cunha taxa de alcol de 0,75 mgs/l
PONTEVEDRA CIDADE
O suceso ocorreu este sábado ás 16.30 horas na rúa José Malvar da cidade. A policía intensificará os controis de alcol e drogas entre os días 6 e 12 de decembro
05 dic 2021 . Actualizado ás 19:29 h.Unha patrulla da Policía Local de Pontevedra acudiu este sábado á rúa José Malvar da cidade tras recibir o aviso dun accidente de tráfico. O suceso produciuse sobre as 16.30 horas e consistiu nun alcance entre dous vehículos. Unha testemuña manifestou aos axentes que o condutor dun dos coches freara sen causa aparente. Foi sometido á proba de alcoholemia e guindou un resultado positivo de 0,75 miligramos por litro, o triplo do permitido. Segundo fontes policiais, no sinistro resultou ferido un dos condutores. A taxa de alcol superaba o límite de 0,60 mgs/l que establece o artigo 379 do Código Penal, polo que se instruíron dilixencias ao xulgado.
Por outra banda, a Policía Local de Pontevedra anunciou este domingo que reforzará os controis de alcol e drogas, sumándose a unha campaña da Dirección Xeral de Tráfico (DXT). Será entre os días 6 e 12 de decembro, unhas datas nas que proliferan comidas e ceas de empresa ou de amigos. Intensificaranse os controis todos os días, tanto nas quendas de mañá, como de tarde e noite.
Positivo en cocaína tras ser delatado polo cheiro da marihuana do coche
Así mesmo, uns días antes, o 1 de decembro, a Policía Local tramitou unha denuncia por condución baixo os efectos do consumo de drogas. Tivo lugar no transcurso dun control dinámico de tráfico establecido na avenida de Lugo da cidade. Unha patrulla parou a un vehículo co fin de comprobar a condución baixo os efectos do alcol ou drogas. Ao solicitarlle a documentación ao condutor, alertou aos gardas un forte cheiro a haxix ou marihuana que saía do interior do coche. Sometido á probas de drogas, deu positivo en THC (tetrahidrocannabinol) e cocaína. Ante as sospeitas de que puidese haber máis droga no interior do turismo, levou a cabo unha inspección que permitiu atopar un paquete de cor marrón con haxix oculto debaixo do volante e cun peso de 100 gramos. Desde a Xefatura da Policía Local indicouse que o condutor foi denunciado por conducir baixo os efectos de estupefacientes (1.000 euros e proposta de retirada de seis puntos do carné) e outra denuncia por tenencia de sustancias estupefacientes. Neste caso, a contía vai en función da gravidade e reincidencia, entre 601 e 30.000 euros.