Montecelo volve ter un paciente en uci por covid nunha xornada con 30 contagios en Pontevedra e O Salnés
PONTEVEDRA CIDADE
Cinco concellos da área sanitaria están libres de coronavirus, mentres as cidades e Forcarei concentran o groso dos enfermos
21 novs 2021 . Actualizado ás 15:09 h.Nova xornada con subida no número de enfermos por coronavirus na área sanitaria de Pontevedra e O Salnés, con trinta novos contagios detectados polo Sergas. A tendencia á alza nos casos é xeral en toda Galicia e no caso específico de Pontevedra destaca que volve haber un paciente por covid na unidade de coidados intensivos (uci) de Montecelo. Os datos ofrecidos polo Sergas indican que hai catro pacientes por coronavirus ingresados en planta en Montecelo e un no Hospital do Salnés. Actualmente permanecen evolucionando da súa doenza nos seus domicilios 213 persoas na área sanitaria. O sábado hanse feito 429 probas PCR, que se suman ás 312.536 xa efectuadas desde o principio do plan de continxencia en marzo do 2020.
En canto á evolución dos concellos, destacan que hai cinco municipios onde non se detectaron casos de covid nin a sete nin a catorce días. Trátase de Ponte Caldelas, Caldas de Reis, Cuntis, Meis e Barro. Pola súa banda, a cidade de Pontevedra rexistra 72 casos activos de covid (un máis que o venres), aínda que a cifra é baixa comparada cos picos da pandemia. En Vilagarcía notificáronse 12 casos a sete días e 22 a catorce. En Sanxenxo , detectáronse doce casos a catorce días e 18 no Grove no mesmo período. Forcarei é o municipio con maior incidencia na área sanitaria, onde con 23 casos a incidencia de covid supera os 250 por cen mil habitantes a sete días e con 31 casos a catorce pasa dos 500. No resto da área sanitaria, o Sergas notifica entre un e nove casos a sete días e case todos manteñen esa cifra a catorce días.