Cambados baixa de nivel máximo a alto. Soben a alto Barro, Portas, Valga e Vilaboa, e pasan a medio Ribadumia, Catoira e Cuntis. Non varían a súa situación o resto de concellos
04 ago 2021 . Actualizado ás 09:49 h.No conxunto de Galicia non hai grandes cambios tras o comité clínico que asesora á Xunta en pandemia. Os 35 expertos, tras analizar os datos de cada concello, acordaron este martes pola noite algúns axustes, cuxas medidas entrarán en vigor o vindeiro sábado, 7 de agosto. Tomando como referencia os tres niveles máis graves de restrición pola incidencia covid (máximo, alto e medio) a área sanitaria de Pontevedra e O Salnés pasa de 19 a 23 municipios. En nivel máximo, que na quinta onda non implica peche perimetral nin da hostalería, seguirán unha semana máis Sanxenxo, O Grove e Meaño. Dese rango baixa Cambados, ao mellorar a súa situación epidemiolóxica. Cambados pasará a nivel alto. No alto seguen Pontevedra, Bueu, Meis, Ponte Caldelas, Soutomaior, A Illa, Vilagarcía, Vilanova, Marín e Poio, e incorpóranse a este nivel Varro, Vilaboa, Portas e Valga . Barro e Vilaboa estaban en nivel medio, mentres que Valga e Portas figuraban no nivel medio-baixo ou básico.
Respecto ao nivel medio, seguen nesa situación Caldas de Reis e A Lama, aos que se suman Ribadumia, Catoira e Cuntis. Ribadumia tamén mellora, xa que estaba en nivel alto, mentres que Catoira e Cuntis empeoran, subindo do nivel medio-baixo ou básico.
Que implican eses niveis de restricións? En máximo e alto están prohibidas as reunións de non convivientes entre a 1 e as 6 horas, sen diferenciar entre ámbito público e privado. Ao aire libre o máximo de persoas é de 10, mentres que no interior é de 6, límites que se poden superar se a reunión é dentro do mesmo grupo de convivencia. En canto á hostalería, en nivel máximo a capacidade interior é do 30 %, e do 50 % en terraza, mentres que no alto, é do 50 % en ambos os casos. O lecer nocturno permanece pechado. É obrigatorio presentar unha proba de inmunidade para acceder ao interior de bares e restaurantes, isto é, un certificado de pauta completa de vacinación (14 días desde a segunda dose), de ter pasado a enfermidade ou un test antígenos negativo en 72 horas.
En nivel medio e medio-baixo están prohibidas as reunións entre as 3 e as 6 horas, sendo o límite de reunións entre non convivientes igual que en máximo e alto, 10 en exterior e 6 en interior. Na hostalería, no medio a capacidade é do 50 % en interior e en exterior, mentres que no medio-baixo, é do 50 % e do 100 % respectivamente. O lecer nocturno está aberto, pero é necesario presentar unha proba de inmunidade para acceder aos locais.