Unha empresaria de Pontevedra aprópiase de 10.600 pezas de vaixela embargadas á súa firma
PONTEVEDRA CIDADE
A Audiencia confirma o ano de prisión, a multa de 2.160 euros e a indemnización doutros 10.169 euros
04 ago 2021 . Actualizado ás 11:04 h.Coa aplicación dunha atenuante de dilacións indebidas, a administradora dunha empresa asentada en Ponche Sampaio, no termo municipal de Pontevedra, foi condenada a un ano de prisión e o pagamento dunha multa de 2.160 euros por apropiarse de máis de 10.600 pezas de vaixela que foran embargadas da sociedade da que era administradora única. Ademais, impónselle o pagamento dunha indemnización de 10.169,36 euros.
A sentenza alude a que todo o procedemento penal que rematou na condena da empresaria tivo a súa orixe nun auto dun Xulgado de Primeira Instancia de Pontevedra «despachando execución por importe de 28.578,51 euros de principal e intereses máis outros 8.573,55 euros para costas gastos e intereses de execución a favor» dunha entidade con sede na avenida de Vigo da cidade de Pontevedra. Posteriormente, con data 18 de febreiro do 2016, ditouse un decreto acordando «proceder ao embargo de bens e mercancías existentes no local da executada», de tal modo que, apenas uns días despois e en presenza da acusada, elaborouse a relación de bens embargados para, acto seguido, nomeala depositaria.
Posteriormente, o 28 de marzo de 2016, levou a cabo unha nova dilixencia de embargo no domicilio da procesada, situado no polígono da Granxa, na localidade de Porriño. De igual modo, decláranse embargados unha serie de bens mobles cos que se confeccionaron dúas listas, «nomeándose de novo á acusada como depositaria dos mesmos».
Xa entón se fixou o 13 de abril do 2016 como o día no que se ía realizar a retirada dos obxectos embargos, acción que se frustrou e non puido levar a cabo. E é que, como recolle a sentenza confirmada pola Audiencia de Pontevedra, antes de que chegase esa data, «evadiu ou distraeu parte dos efectos embargados». Concretamente, acúsaselle de ter apropiado de 10.657 pezas de vaixela: 3.728 cuncas de té de gres; 3.888 cuncas de café de gres; 2.771 pratos de café e té de gres; unha trintena de cazuelas rectangulares de gres e 240 cazuelas de gres de cor, conxunto que foi valorado pericialmente en 10.169,36 euros, cantidade que agora se consigna a modo de indemnización.
A este respecto, e como consecuencia destes feitos, os maxistrados acreditan que a segunda empresa, a situada na avenida de Vigo de Pontevedra, «ao día da data non logrou a satisfacción integra do crédito obxecto de execución».
«Un pouquiño espesa»
O certo é que a defensa da empresaria recorreu a súa condenada alegando, entre outras cuestións, hostilidade por parte da maxistrada que a condenou. A este respecto, esta última requiriulle a que se limitase a contestar, palabras que, nun momento dado, acompañou da expresión que a vía «un pouquiño espesa». A Audiencia recoñece que, «nun esforzo de contención, podería evitarse» tales palabras, pero remarcan que as mesmas se circunscriben «á necesidade, acorde coas facultades de dirección, de lembrar á acusada a necesidade de centrarse no que se lle pregunta, evitando a falta de concreción, as reiteradas evasivas e a lentitude no que se desenvolve o interrogatorio».
En todo caso, esta sentenza é recurrible en casación.