Os contaxiados por covid hospitalizados soben a 35 en Pontevedra e O Salnés
PONTEVEDRA CIDADE
A área sanitaria segue a súa escalada de casos con 2.615 activos e 206 novas infeccións. Os concellos en risco extremo ao superar os 250 positivos de incidencia a 14 días son vinte. Sanxenxo roza os 2.000
23 jul 2021 . Actualizado ás 15:59 h.Os sanitarios viñan alertando. A explosión de contagios covid debido á variante delta íase trasladar, co paso do tempo, nun incremento dos pacientes que necesitan ingreso hospitalario. Na área sanitaria de Pontevedra e O Salnés esa circunstancia estase dando. Segundo o informe do Sergas deste venres, hai 2.615 casos activos, superando o teito da pandemia do pasado febreiro. Son 130 máis que as infeccións reportadas o xoves e nas últimas 24 horas déronse 76 altas epidemiolóxicas, o que deixa a cifras de novos contagios en 206 na última xornada. As persoas con coronavirus ingresadas nos hospitais son 35, dez máis. Delas, trátase a 30 enfermos en planta de tres centros (25 en Montecelo, 4 no comarcal do Salnés e un no privado Quironsalud Miguel Domínguez) e a 5 graves en unidades de críticos do principal hospital do Chop.
O resto de infectados, 2.580, teñen síntomas leves da enfermidade ou son asintomáticos, polo que teñen que gardar illamento nos seus domicilios baixo seguimento de persoal de atención primaria. Desde o inicio da pandemia en marzo do 2020 as persoas curadas son xa 14.905, mentres que as que perderon a vida polo virus son 181, sen novos falecementos na área de saúde desde o 2 de xuño.
A tendencia á alza dos contagios plásmase na incidencia acumulada. Son xa vinte os municipios en risco extremo ao superar os 250 casos por cen mil habitantes. Con máis de 500 están as dúas cidades da área, Pontevedra e Vilagarcía, Soutomaior, Marín, Bueu, Poio, Sanxenxo, O Grove, A Illa, Meaño, Vilanova, Cambados, Meis e Ribadumia. Sanxenxo segue sendo a localidade coa incidencia máis alta, 1.923 a 14 días, e 1.142 a 7. O Grove sitúase en 1.169 a 14 días, e en 922, a 7. Na pinza de 250 a 500 positivos figuran Barro, Caldas de Reis, Cuntis, Moraña, A Lama e Ponte Caldelas. O mellor escenario, cunha incidencia entre 50 e 150 casos, téñeno Valga , Catoira, Campo Lameiro, Cerdedo-Cotobade e Forcarei. Non hai ningún concello libre de covid.
Respecto da planificación de vacinación, este venres é unha das xornadas con menos citados. Son 385 no recinto feiral de Pontevedra. Picaránselles con Moderna, AstraZeneca ou Janssen.