A área sanitaria baixa os seus casos activos a 482, con 18 novos contagios no último día. Marín mellora a súa incidencia e preocupa a evolución en Cuntis, con 10 positivos nunha semana
10 may 2021 . Actualizado ás 21:10 h.Lixeiro descenso de casos activos de covid e de novos contagios diarios, pero un hospitalizado grave máis. É a conclusión do informe do Sergas deste luns, con datos do domingo ata as 18 horas. Na área sanitaria de Pontevedra e O Salnés hai 482 infeccións activas. Son 6 menos que as reportadas o domingo e nas últimas 24 horas déronse 24 altas epidemiolóxicas, o que deixa a cifra de novos contagios en 18 (fronte aos 35 precedentes) nunha xornada na que se fixeron moitas probas diagnósticas, 1.407 PCR.
En canto ás persoas infectadas que necesitan atención hospitalaria, son 35. Hai 26 enfermos en planta de dous centros (16 en Montecelo e 10 no comarcal do Salnés, en Vilagarcía) e 9 graves na unidade de coidados intensivos (uci) do principal hospital do Chop. É un paciente crítico máis na uci de Montecelo, cuxa capacidade é de 10 camas. Só o Chuac da Coruña e o Chuvi de Vigo teñen, con 10, máis pacientes de críticos que Pontevedra. O resto de contaxiados na área de saúde, 447, teñen síntomas leves da enfermidade ou son asintomáticos e están en illamento nos seus domicilios baixo seguimento de persoal de atención primaria a través do seu centro de saúde.
Desde o inicio da pandemia, en marzo do 2020, as persoas infectadas co SARS-CoV-2 xa curadas son 13.237, mentres que as que perderon a vida polo virus son 173. O total acumulado de probas PCR ascende a 222.569.
Como está a incidencia acumulada nos concellos da área? O mapa de Sanidade ofrece algúns cambios. Cambados mantense como o único municipio cunha incidencia que supera os 500 casos por cen mil habitantes. Está en nivel máximo de restricións, con peche perimetral e da hostalería, e rexistra 87 positivos en 14 días, dos que 56 foron na última semana. Iso guinda unha incidencia de 634 a 14 e de 408 a 7 días.
Vilanova é o único concello na pinza de 250 a 500 casos, da que se saíu Marín dada a súa boa evolución epidemiolóxica, con 48 casos en dúas semanas, dos que 14 foron na última. Marín está agora no rango de 150 e 250 con Cerdedo-Cotobade, Ponte Caldelas e Cuntis. Preocupa a evolución da vila termal, xa que os seus 10 positivos detectáronse na última semana. O groso dos concellos están na pinza de 50 a 150. Ademais de Pontevedra e Vilagarcía, figuran Barro, Caldas de Reis, Moraña, Campo Lameiro, Soutomaior, Vilaboa, Bueu, Poio, Valga , Catoira ou Meaño.
A mellor situación téñena cinco concellos libres de covid na última semana (Vilaboa, A Illa, O Grove, Catoira e Ribadumia) e outros catro sen casos en 14 xornadas. Son Portas, Forcarei, A Lama e Meis.