Doce contagios menos en centros educativos, onde hai oito aulas que están pechadas
PONTEVEDRA CIDADE
A evolución é boa, xa que despois das vacacións de Nadal a escalada chegou a superar os 500 positivos nos centros educativos
25 feb 2021 . Actualizado ás 05:00 h.A incidencia covid nos centros educativos mantén a tónica de baixada xeral no conxunto da área sanitaria de Pontevedra e O Salnés. Segundo os datos do informe do Sergas de onte, en escolas infantís, colexios e institutos hai 172 positivos (12 menos), oito aulas pechadas (tamén 12 menos) e un centro infantil clausurado. Trátase de Globos, en Pontevedra, aínda que rexistra só un caso.
A evolución é boa, xa que despois das vacacións de Nadal a escalada chegou a superar os 500 positivos nos centros educativos. As clases sen actividade presencial están situadas na escola infantil Santiago Apóstol de Soutomaior (2); o CEIP A Carballeira de Lourizán, en Pontevedra (2): o CPR Santiago Apóstol de Soutomaior (2); a escola infantil municipal de Vilanova de Arousa (1) e o CPI Julia Becerra Malvar de Ribadumia (1).
Respecto dos centros que rexistran máis casos de covid, encabeza a relación o CPR Os Salgueiros de Pontevedra con 12 positivos na súa comunidade educativa, seguido do CEIP A Carballeira de Lourizán, tamén en Pontevedra, con 10. Con oito casos de coronavirus figuran dous centros, o IES Illa de Tambo de Marín e o CPR Santiago Apóstol de Soutomaior.