Caldas e Ponte Caldelas reparten un décimo do 86986, o primeiro quinto premio en saír
PONTEVEDRA CIDADE
Casa Baltar e a administración número 1 da vila do Verdugo agardaban confirmación da delegación de Loterías
22 dic 2020 . Actualizado ás 14:34 h.O madrugador e moi repartido primeiro quinto premio en saír no sorteo de Nadal 2020, o 86986, deixou agraciados en Galicia. Entre os moitos sitios onde se vendeu este número, figuran dúas localidades da comarca de Pontevedra. Son Caldas de Reis e Ponte Caldelas. En Caldas foi en casa Baltar, un bar restaurante situado na rúa Alhóndiga, 9, que tamén é administración e receptor de lotería. Alén do teléfono, Carmen Domínguez Baltar, que acaba de abrir o establecemento, aínda non sabía canto vendera. «Aínda non me chamaron da delegación, pero creo que é un décimo azul por máquina. Soábame ese número porque é o prefixo da provincia», sinalou. Casa Baltar é restaurante desde 1921, e foi o primeiro establecemento en selar as quinielas de fútbol na localidade. Desde a delegación de Loterías e Apostas do Estado (LAE) en Vigo confirman que en casa Baltar se vendeu un décimo e outra na administración de Ponte Caldelas. Cada un implica un premio de 6.000 euros
En Ponte Caldelas, tamén se vendeu parte de 86986 na administración de lotería número 1, situada na rúa da Igrexa, 12. A loteira, que se decatou por La Voz de que vendera o número, descoñecía a cantidade exacta. Con anterioridade vendera un primeiro e un segundo da lotería do xoves.
Nun sorteo esquivo con Pontevedra, case ao final chegaba outro belisco doutro quinto premio, o 43.831. Parte deste número vendeuse no centro comercial Carrefour de San Blas, en Salcedo (Pontevedra), e no bar Xolda, de Santa Lucía, en Moraña. «Creo que vendemos por máquina, pero aínda non sabemos canto», dicía Andrea Ramos. Tampouco sabía os detalles Javier Piñeiro, da cafetería Xolda.