A Praza de España acolle a nova edición desta feira, que no seu sexto ano aposta pola innovación de carácter sostible.
21 sep 2019 . Actualizado ás 05:00 h.«Paréceme unha feira moi chula e moi atraente», comenta Aída Alonso, unha das moitas emprendedoras que esta fin de semana participan en Pont-Up Store. O evento máis emprendedor de toda Pontevedra celebra a súa sexta edición e faino ao grande, con ata 46 casetas e 60 actividades nos que a sustentabilidade, a arte e a tecnoloxía ocupan un lugar destacado.
Decenas de pontevedreses achegáronse onte á Praza de España para gozar desta oferta cultural. A maioría, coincidindo co espírito da feira, eran novas, pero entre a multitude tamén se atopaban adultos de todas as idades que contemplaban con curiosidade as moitas propostas que se alzaban ante eles. É o caso de José Antonio, que volvía por segunda vez ao evento e que defendía que unha iniciativa como esta «ten que habela en toda Galicia». «Para min é moi importante que haxa un foro no que as empresas poidan mostrar as súas ideas para emprender», sinalaba, coincidindo cos empresarios das casetas. «A min pareceríame ben que esta feira tivese un carácter rotativo, que se celebrase cada estación nas principais cidades de Galicia», comenta Jorge, un dos rostros tras A3 Proxectos que ve neste evento unha oportunidade para achegar o seu produto á poboación. Jorge, que leva xa ano e medio» traballando na súa solución de realidade virtual e aumentada para proxectos de enxeñería e arquitectura, decidiu presentarse á feira despois de «os bos comentarios» que había na rede e recoñece estar «moi contento» co resultado. «Estamos encantados». Como el, Lucía, do estudo Avelaíña, tamén participaba por primeira vez no evento. Facíao motivada polos comentarios dunha compañeira, que creu que o evento «podía interesarlle», e cunha variedade de ilustracións e tote bags cun deseño «sostible». «Hai que intentar coidar ao máximo o Medio», explica.
Precisamente, a sustentabilidade, un dos puntos clave do evento, é un dos aspectos que máis lle interesan a Lyn, estadounidense residente en Portugal que se atopou coas casetas «case por accidente», mentres realiza o Camiño de Santiago. «Gústame ver proxectos e empresas que son consciente do cambio climático», afirma. Para Lyn, este evento parécelle útil, «brillante». «Creo que é boa idea que os mozos teñan un lugar onde mostrar o que teñen que ofrecer», di, algo que tamén comparten Peter e Jane, matrimonio de peregrinos dublineses que decidiron atrasar a súa marcha de Pontevedra para gozar un pouco máis da cidade. «É unha boa oportunidade para que os mozos mostren os seus produtos. É moi interesante», sorrín, mentres máis e máis persoas achéganse á praza.