O GDR Pontevedra Norte outorgou axudas por 474.000 euros a sete proxectos empresariais
PONTEVEDRA CIDADE
O investimento previsto supera o millón de euros prevese a creación de vinte postos de traballo
18 sep 2019 . Actualizado ás 05:00 h.Sete proxectos de empresas radicadas en Lalín, A Estrada, Silleda, Agolada e Dozón recibirán subvencións do plan Leader para acometer investimentos que melloren as súas instalacións e xeren ou consoliden emprego. A xunta directiva do Grupo de Desenvolvemento Rural (GDR) Terras de Pontevedra Norte aprobou onte esas iniciativas produtivas que suporán investimentos de máis de 1,1 millóns de euros. As axudas outorgadas sitúanse nos 474.182 euros. Ademais, a previsión é crear unha vintena de postos de traballo, principalmente para colectivos desfavorecidos, así como consolidar outros 48.
A directiva que preside o alcalde de Rodeiro, Luis López, comezou a reunión mostrando a súa pesar polo triplo crime de Valga . Despois seleccionáronse os proxectos produtivos presentados na primeira convocatoria deste ano, que previamente foran analizados e verificados pola Axencia Galega de Desenvolvemento Rural (Agader) en base ao orzamento dispoñible para as anualidades 2019-2020 por un total de 530.185 euros. Aprobaron sete iniciativas, dúas delas tanto na Estrada como en Dozón, mentres haberá unha en Lalín, Silleda e Agolada.
Na Estrada asínaa Lavandería Elegante S. L. acometerá con esta subvención do Leader a mellorar da eficiencia enerxética das súas instalacións e a compra de nova maquinaria para mellorar o seu rendemento. Mentres, Leite Ulla S. L. quere acometer obras para ampliar a zona de elaboración de queixos e produción láctea, así como ofrecer novos produtos ao consumidor.
En Dozón tamén serán dous as iniciativas subvencionadas a través do GDR. Unha consiste na creación dunha industria agroalimentaria para a fabricación de xeo seco e centro de recarga de gases, que promove Facosa Equipamento Industrial S. L., mentres a segunda a promove Avícola Tratante para acometer melloras no centro de clasificación e embalaxe de ovos.
Pola súa banda, en Lalín apóiase un proxecto de David Liñares para crear unha pequena envasadora de mel en Gresande. E en Silleda aprobouse unha iniciativa de carácter social promovida por Coviastec para equipar a residencia e o centro de día situado nas inmediacións do recinto feiral. Está prevista a creación de catorce postos de traballo, na súa maioría para mulleres da comarca.
O último proxecto corresponde ao taller mecánico Ventosa de Agolada, que adquirirá unha máquina equilibradora de rodas para ampliar a súa liña de negocios a pequenos turismos da zona. Tras a aprobación de onte será o Agader o encargado de remitir aos promotores a resolución da axuda, coa distribución proposta. Desde o GDR anímase a seguir presentando proxectos para optar a estas axudas.