O bacharelato artístico: unha opción minoritaria que reclama o seu espazo
PONTEVEDRA CIDADE
O IES A Xunqueira I de Pontevedra exhibe ata final de mes os traballos dos alumnos de 1º e 2º cursos
15 jun 2019 . Actualizado ás 11:56 h.O IES A Xunqueira I de Pontevedra é un dos centros públicos de Pontevedra que imparten, xunto co IES Frei Martín Sarmiento, o bacharelato artístico na cidade. Trátase dunha modalidade minoritaria en número de alumnos. Branca Barrio é profesora de volume e fundamentos da arte no instituto A Xunqueira I. Este venres ultimaba, xunto a varios estudantes, a exposición que recolle os traballos que os alumnos, tanto de 1º como de 2º de bacharelato, realizaron durante o curso que está a piques de acabar.
A mostra, que calquera persoa pode visitar ata final de mes en horario de 9 a 14.30 horas de luns a venres, pretende ser un granito de area para dar visibilidade a este bacharelato artístico. «Non é o primeiro ano que se fai, pero nesta ocasión intentamos facer algo moi completo. A exposición está enfocada a que a xente saiba en que consiste esta modalidade de bacharelato, que vexa que se ofrece aos alumnos. Para os estudantes é como unha referencia, un escaparate dos seus traballos», sinala a docente.
No caso do IES A Xunqueira I menos de oitenta alumnos cursan esta modalidade de bacharelato entre os dous cursos, que imparten cinco profesores. Os docentes consideran que este tipo de iniciativas serven tanto para os estudantes como para os pais. A exposición deste ano recolle un centenar de pezas de distintas disciplinas artísticas. Pódense ver esculturas realizadas con materiais como barro, cera, cartón pluma e ata arame. Estas obras feitas con arames exhibíronse no Salón do Libro Infantil e Xuvenil de Pontevedra, desvela Branca Barrio, que leva dous anos como docente no IES A Xunqueira I.
A mostra tamén inclúe fotografía, deseño de carteis ou de cadeiras, cómics que recibiron algúns premios e varios debuxos e gravados. Que perfil de alumnos decántanse hoxe por este bacharelato? «Danse dous perfís basicamente. Hai un alumnado que ten unha clara vocación artística e outro tipo de alumnos que acaban neste bacharelato case de rebote, non o teñen moi claro cando rematan a ESO e vén ver se se atopan», sinala Branca Barrio. En canto ás saídas profesionais, os estudantes que contan claramente cun perfil artístico adoitan ampliar a súa formación cursando o grao universitario en Belas Artes, aínda que a tendencia dos últimos anos ha permitido estender o campo laboral cara a ciclos de animación e de deseño.
Sobre o nivel da exposición, a docente do IES A Xunqueira I subliña que hai pezas mellores e peores. «Non hai que esquecer que son alumnos que veñen de 4º da ESO e que practicamente non fixeron nada porque as horas de educación plástica e visual son moi poucas. Outra cousa son aqueles estudantes que van a clases pola súa conta», remacha. A profesora deixa unha reflexión: «Se se lle dedicasen as mesmas horas que ás matemáticas moitos dos alumnos serían Leonardo da Vinci, pero non hai horas nin tempo».