Ediserpo renunciou á obra do campo de Ponche Sampaio con menos do 20 % executado

As obras do novo campo de fútbol de Ponche Sampaio marchan, agora si, a bo ritmo, Tanto é así, que o Concello calcula que nuns catro meses -é dicir, cara a setembro- o proxecto podería estar totalmente rematado.

Con todo, hai pouco máis dun mes todo eran malos agoiros con respecto a esta obra que executa o Concello de Pontevedra e que ten un custo de algo máis de 1,1 millóns de euros.

A empresa á que se adxudicou o proxecto, Ediserpo, iniciou os traballos a finais do pasado verán, pero en Nadal deixou de traballar debido a problemas financeiros. O Concello deu un prazo para retomar os traballos, pero Ediserpo acabou renunciando definitivamente ao contrato en febreiro, polo que houbo que readjudicar o proxecto. Foi a UTE formada por EC Casas e Imesapi a encargada de retomar o proxecto. As obras renováronse a principios deste mes.

Onte, a xunta de goberno local deu conta do informe definitivo dos servizos técnicos sobre o que executara Ediserpo cando se rescindiu a súa vinculación co proxecto: apenas chega ao 20 % da obra contratada. De feito, de 1.163.000 euros do orzamento, Casas-Imesapi ten que executar 923.577. É dicir, algo máis do 80 % do proxecto. A adxudicataria orixinal apenas levara a cabo a explanación do terreo adquirido polo Concello para o novo campo de fútbol.

Torretas de iluminación

O portavoz do goberno local, Raimundo González Carballo (BNG), sinalou onte que os traballos agora si marchan a bo ritmo e que a UTE está a traballar nas bases para as torretas de iluminación e as gabias perimetrais de rega e canalización eléctrica e nas estruturas para os vestiarios.

---

---

---