Segunda B Nin locais nin visitantes logran encaixar tantos en Pontevedra
16 oct 2018 . Actualizado ás 05:05 h.Oito xornadas despois, a tempada granate comeza a tomar forma. Os de Luismi deron cun xogo efectivo, afastándoos da derrota. Os granates só perderon dous encontros dos oito disputados. Saborearon a vitoria en dúas ocasións e empataron o resto. Curiosamente, esta fin de semana volveuse a dar o mesmo resultado que no seu anterior encontro caseiro: ningunha das dúas escuadras foi capaz de dar co gol.
Convertéronse as porterías de Pasarón nunha especie de redes antiesféricos. Desde o 16 de setembro, xusto hai hoxe un mes, ningún tanto subiu aos marcadores do campo pontevedrés. Aínda que un podería entendelo como algo negativo, ou mostra empírica da incapacidade de facer gol do Pontevedra, a realidade dista lixeiramente de tal feito.
Os de Luismi xogaron os seus últimos partidos en casa moi correctamente. Plantando cara a dúas dos ósos máis duros da categoría. Primeiro un perigoso Celta B e antonte a unha Ponferradina que continúa líder. Só o Pontevedra e o Salamanca conseguiron asinar as táboas co equipo do bierzo.
E o gol? Resistiuse en casa estas últimas semanas, si. Os granates xeraron ocasións e oportunidades, e o traballo de Luismi parece que terá que continuar traballando nesa parte de finalización. Tanto a construción como o desenvolvemento son correctos, innegablemente.
Doutra banda, Luismi xa destacou o domingo nas súas declaracións que está plenamente satisfeito co traballo defensivo. Non é para menos. A defensa de Pasarón anulou a un dos dianteiros máis perigosos da categoría, ao brasileiro e ex xogador do Pontevedra, Yuri. «Mantivemos a portería a cero unha semana máis. Iso significa que sempre imos sumar e mesmo imos ter opcións de gañar o encontro», sinalou o técnico. Pode Pasarón volver converterse nun fortín de gran valor para o Pontevedra esta tempada. Ese é o camiño a seguir, que dúbida cabe. A fin de semana que vén chegarase ao ecuador da primeira volta.
Álex Fernández, lesionado
A súa ausencia sorprendeu, xa non só ao comprobar que non só non estaba titular, senón que tampouco estaba convocado. Álex Fernández lesionouse na última sesión de adestramento previa ao partido do domingo, o sábado. Ao parecer sufriu un tirón na zona do cuádriceps e non puido continuar. Pode revestir certa importancia, e o técnico granate xa avisou de que poida que vaia a estar « un tempo parado».
Luismi mostrouse certamente contento tras o resultado obtido o domingo, deixando atrás unha serie de encontros de enorme complexidade, tras catro partidos loitando por superar a rivais que aspiran a estar nos postos máis altos da táboa.
O próximo partido do Pontevedra está previsto para o domingo 21 de outubro a domicilio. Será no campo do Burgos, actualmente na décimo quinta posición.