A «foodtruck» serviu bocadillos cuxo contido nutricional testaron alumnos do IES Frei Martín Sarmiento
18 ene 2018 . Actualizado ás 20:11 h.«En principio a aceptación está a ser boa. Nótase ademais que son alumnos do ciclo de nutrición». Quen fala é Martín Casalderrey. Ataviado co seu uniforme branco encárgase de presentar e de repartir dous tipos de bocadillos a estudantes e profesores do IES Frei Martín Sarmiento de Pontevedra. Martín estuda 1º do ciclo superior de Dirección de Cociña no CIFP Carlos Oroza e a pé da foodtruck PonteVan explica en que consiste o tentempié.
«Son dous bocadillos, o Corral , que inicialmente era con pechuga de pito, pero que aquí leva xamón cocido, queixo e rúcula da horta, e o Mareiro, a base de salmón afumado, herbas aromáticas, tomates confitados e aguacate». Relátao a pé da furgoneta que este mércores iniciou a súa xira polos institutos colaboradores. Que bocadillo está a triunfar máis? «O Mareiro moito máis, o salmón chama máis que o xamón cocido». Ambos se podían acompañar dunha sala, picante ou de allo.
Martín remacha que o pan dos bocadillos é artesán e foi elaborado polos seus compañeiros do ciclo de Panadería do Carlos Oroza. Alba Durán e Ana Castiñeiras son alumnas de 1º do ciclo de Dietética. A primeira está a probar o Mareiro e a segunda, o Corral . Coinciden en destacar que o pan está «moi rico» e na importancia do proxecto PonteVan, que uniu desde o pasado curso a estudantes e docentes de catro centros da cidade. Ademais dos citados Carlos Oroza e Frei Martín Sarmiento, tamén participan no proxecto o IES Montecelo e o CIFP A Xunqueira.
María José Couceiro, profesora da materia Alimentación equilibrada, comenta que os seus alumnos tiveron que testar previamente o equilibrio nutricional deses dous bocadillos. Aínda que un ten máis kilocalorías que o outro, a docente subliña que se pode dicir que os dous son «sans». A inxesta do Corral supón 361 kilocalorías e o Mareiro, 257.
Calendario
O trajín é constante no interior da foodtruck. Cada alumno sabe o que ten que facer. Son prácticas reais. A certa distancia, o profesor Ricardo Fernández Guerra observa aos seus estudantes. Está acompañado por Teresa Barreiro, coordinadora de emprendimiento do Carlos Oroza. Ricardo conta que o vindeiro mércores repetirán visita no CIFP A Xunqueira. Antes de viaxar a Bilbao coa furgoneta para participar nun fórum profesional de foodtrucks e de visitar o Basque Culinary Center de San Sebastián, tamén acudirán ao IES de Teis (Vigo) e a Ourense, onde presentarán este proxecto innovador de FP a outros centros integrados.
Outra iniciativa vinculada a PonteVan desenvolverase durante catro venres no Carlos Oroza. Será a partir do 16 de febreiro. Durante esas mañás dos venres, de 10.30 a 13 horas, os alumnos ofrecerán diversas propostas a prezos económicos. «O que buscamos son dúas cousas, por un lado evitar desperdicios de comida e, por outro, fomentar a creatividade», sinala Ricardo Fernández. É a achega do Carlos Oroza a unha iniciativa mundial que impulsa a Organización das Nacións Unidas para a Alimentación e a Agricultura (FAO). Antes de visitar os institutos colaboradores, a furgoneta PonteVan tamén recalou nas empresas que axudaron no deseño deste proxecto de innovación educativa.