Horas «terribles» para os clientes dunha correduría de seguros caldelana

Se algo teñen as aldeas e vilas pequenas é que o que lle ocorre a un veciño pasa a estar na fala da xente de forma fulminante. En Ponte Caldelas, algúns veciños descubriron nas últimas horas que o seguro que contrataran a través dunha correduría da vila -por exemplo, un bar que tiña unha póliza do local- non fora pagado á compaña correspondente. A noticia correu como a pólvora porque a correduría ten un número elevado de clientes. E, onte, moitos deles, que dicían que estaban pasando unhas horas «terribles e con moitos nervios», fixeron cola toda a mañá ante o local para pedir explicacións.

A empresa íalles contando que o que pasara é que o empregado que lles vendeu os seguros -que onte non estaba na oficina- quedou co diñeiro. A firma insistía en que só se trata dun problema administrativo, que non hai ninguén sen asegurar -algún cliente dicía o contrario e indicaba que a aseguradora lle mandou unha carta dicíndolle que non había pago e que non estaba asegurado-, que atenderá a todos os afectados e que se fará cargo «de todo».

Os distintos afectados contaban a mesma historia. A correduría caldelana atendíaa unha persoa á que coñecían desde sempre. «Era bo rapaz e facía moi bos prezos. Sempre dicía que se pagabas polo banco era algo máis e se lle dabas os cartos en man cobrábache un pouco menos», indicaban. Así, o normal era que lle pagasen en efectivo. A algúns no pasado deulles recibos do abono. Pero ultimamente xa non os repartía. «Dicía que tiña o ordenador roto e que xa os mandaría», contaban cunha mesma voz. Así, foron pagando desde pólizas de coches a locais ou tamén billetes de avión sen que lles desen ningún papel que xustificase o pagamento. «Eu pagueille en abril dous recibos do seguro do coche, o meu e o do meu mozo, máis de 600 euros. Non me deu recibo, díxome que xa mo mandaría polo teléfono, pero non o fixo. Pedinllo varias veces e sempre me deu largas», explicaba unha nova. Chamou á compaña e dixéronlle que ambos os seguros estaban sen pagar.

Onte na correduría non estaba ese axente, senón outras persoas. Deron a cara ante os afectados, prometéronlles que se farán cargo de todo e insistiron en que a empresa é «a principal vítima», posto que o empregado en cuestión non lles abonou o diñeiro que foi cobrando. Indicaron que o operario está despedido, pero que de momento non presentaron denuncia con el porque «hai que mirar o alcance e atender primeiro aos clientes». Di tamén que está a mandar cartas aos afectados.

---

---

---