Roi Rodríguez e Adrián Mosquera buscarán as primeiras medallas galegas no Europeo de Esprint
POIO
Adrián Sieiro brilla na xornada inaugural da cita de Múnic no C2 500
18 ago 2022 . Actualizado ás 20:36 h.A xornada inaugural do Campionato de Europa absoluto de piragüismo esprint contou coa participación destacada do poiense Adrián Sieiro. Xunto ao balear Joan Antoni Moreno, o galego foi un dos protagonistas da delegación española en Múnic no único dos catro días de competición programados ata o domingo sen medallas en xogo. E iso, tras imporse con suma autoridade na segunda e última serie do C2 500, barco que recuperará o seu lugar no programa olímpico nos Xogos de París 2024.
Sieiro e Moreno conseguiron o primeiro dos tres salvoconductos da súa serie cos que evitar o paso intermedio por semifinais accedendo á pelexa polo título continental do domingo (13.29 horas) cun crono de 1.46,572. Fixérono con nada menos que 612 milésimas de segundo de vantaxe sobre o barco dos húngaros Jonatan Hajdu e Adam Fekete, os mesmos que cubriran a metade da proba a cargo de a regata, cos españois como inmediatos perseguidores a 521 milésimas. Sieiro e Moreno endosáronlles 1,1 segundos nos últimos 250 metros.
O kayakista xixonés do Fluvial de Lugo Pelayo Roza deberá, pola contra, superar na tarde do venres a criba das semifinais do K2 500 xunto a Juan Oriyés, tras non pasar do quinto posto na súa eliminatoria da xornada inaugural do Europeo.
Este venres debutan no Europeo o groso da ducia de galegos que integran a selección española en Múnic, buscando todos eles o pase directo ás finais dos seus respectivos barcos. O viveirense Cristian Toro , no K4 500 (9.05 horas) e o K2 200 (12.20), a pontevedresa Antía Jácome, no C1 200 (10.15), o morracense Pablo Graña, no C1 200 (10.30 horas), e no K1 200 os padeeiros do Kaiak Tudense Lara Feijoo (10.40) e do Ría de Betanzos Iván Fernández (10.50).
Na primeira xornada con medallas en xogo, o tomiñés Roi Rodríguez e o seu compañeiro asturiano no Kaiak Tudense Pedro Vázquez disputan, desde as 14.22 horas, a final directa do K4 1.000. Algo menos de dúas horas despois, a partir das 16.11, o paracanoísta barbancés Adrián Mosquera (Piragüismo Rías Baixas-Boiro) paleará a final do VL3 200 deste venres tras ser terceiro na súa eliminatoria da xornada inaugural do Europeo, cun tempo de 51,523.